د اروپا پارلمان غړې هانا نیومن وايي، له اروپا د طالبانو تر واک لاندې افغانستان ته، د افغان کډوالو ایستل «نه یوازې یوه انساني ماتې»، بلکې یوه ستراتېژيکه تېروتنه ده.
رخشانه: نیومن نن (چهارشنبې د غوايي ۱۶ مه) په خپله اېکس پاڼه د یوه پوسټ په خپرولو سره، له اروپا د طالبانو تر واک لاندې افغانستان ته د افغان کډوالو د ایستلو په تړاو غبرګون ښودلی دی.
هغې لیکلي دي: «که اروپا افغان ځوان نارینه بېرته بېوزلۍ او ناهیلۍ ته ورستانه کړي، ډېری د هغو به د طالبانو له هغو شبکو او دیني مدرسو» سره یو ځای شي، چې د دې ډلې تر کنټرول لاندې دي.
نیومن وايي، ناهیلي کوونکو شرایطو ته د خلکو په ستنولو طالبان کمزوري کېږي نه، بلکې د هغه جوړښت د پیاوړتیا لامل کېږي، چې دا ډله په واک کې ساتي.
د اروپا پارلمان دې غړې ټینګار کړي، چې دا کار به په نړیوال کچه طالبان عادي او مشروع کړي.
هغې خبرداری ورکړی، چې د افغان کډوالو ایستل به د دې ډلې تر کنټرول لاندې «افراطي شبکو او جوړښتونو» د پیاوړتیا لامل شي.
په دې وروستیو کې داسې راپورونه ورکړل شوي، چې اروپايي ټولنه د افغان کډوالو د بېرته ستنولو په اړه د خبرو اترو لپاره د طالب چارواکو کوربه توب کوي.
د اروپايي ټولنې دې ګام د بشري حقونو د بنسټونو اندېښنې راپارولې دي.
