هرات ولایت کې سیمه ییزه سرچینې وايي، د دغه ښار د اوومې ناحیې اړوند سیمه کې یو مېړه له خپلې ښځې په ظالمانه ډول سرپرې کړی دی.
رخشانه: دغه پېښه پرون (سه شنبې د غوايي ۱۵ مه) د هرات ښار د اوومې ناحیې اړوند د ابرېښم جادې د «کوچه حمام دوبۍ» سیمه کې رامنځ ته شوې ده.
هرات کې یوې سرچینې رخشانې رسنۍ ته ویلي، دا ښځه «سونیا» نومېده او ۲۲ کلنه وه.
د سرچینې په وینا، له دې ښځه د خپل خاوند له خوا د «موکت پرېکوونکي» په مټ سر پرې کړل شوی دی.
سرچینې زیاته کړې، د دې ښځې مېړه لومړی د خپل لاس رګ پرې کوي او کله یې چې مېرمن له کوره د وتلو هڅه کوي، سر یې د موکت پرېکوونکي په واسط له تن نه بېلوي.
د سرچینې د معلوماتو له مخې، د ښځې د وینو نښتې «پر زینو، پردو او توشکو» لیدل کېږي.
د ښځې خاوند د پېښې له رامنځ ته کېدو وروسته له سیمې تېښته کړې ده.
له دې ښخې یو درې کلن ماشوم پاتې دی.
معلومه نه ده، چې دا څه په کوم دلیل وژل شوې ده.
تر اوسه هرات کې طالب چارواکو په دې اړه څه نه دي ویلي.
واک ته د طالبانو له بیا رسېدو وروسته، هېواد کې د کورنیو له خوا د ښځو او نجونو د وژل کېدو پېښې زیاتې شوې دي.
په دې وروستیو دوه اوونیو کې له یو شمېر ولایتونو د کورنیو د غړو له خوا د ښځو د وژل کېدو راپورونه ورکړل شوي دي.
