د «افغان ښځو د تاریخ د بدلون غورځنګ» غړو ویلي، په ښځو باندې د طالبانو پراخه محدودیتونه او د مجرمینو تعقیب ته نه پاملرنه، په هېواد کې د «ښځو هدفي وژنو» د زیاتېدو لامل شوي دي.
رخشانه: د دې غورځنګ غړو نن (پنشنبې د غوايي ۱۷ مه) په یوه اعلامیه کې په هېواد کې «د ښځو د هدفي وژنو، کورني تاوتریخوالي او له بشري حقونو د پراخو سرغړونو» د زیاتوالي په اړه اندېښنه ښودلې ده.
په دې اعلامیه کې راغلي، هېواد کې د ښځو او نجونو په وړاندې تاوتریخوالی بې مخینې زیات شوی او قانون د حاکمیت، خپلواک قضايي سیستم او ملاتړو کړنلارو په نه شتون کې، قربانیان عدالت ته له هر ډول لاسرسي څخه بې برخې دي.
معترضو ښځو په دې وروستیو کې هېواد کې د ښځو هدفي وژنو زیاتېدو ته په اشارې ویلي، داپېښې «د جنسیت پر بنسټ ولاړ تاوتریخوالی، د معافیت کلتور او په افغانستان کې د عدالت او حساب ورکولو سیستم بشپړ پاشلتیا منعکسه کوي.»
اعلامیه کې راوړل شوي د طالبانو سیاستونه او چلند، له هغې جملې د ټولنیزو برخو څخه د ښځو منظم ایستل، په زده کړو او کار سخت محدودیتونه او د تاوتریخوالي د عاملینو د محاکمې لپاره بې پروايي، د دې نازک وضعیت په خپرېدو کې مرسته کړې ده.
د افغان ښځو د تاریخ د بدلون غورځنګ غړو له نړیوالې ټولنې او نړیوالو بنسټونو غوښتي، چې افغانستان کې «جنسیتي توپير» په رسمیت وپېژني او د عاملینو د مستند کولو او تعقیب لپاره ګام پورته کړي.
دوی د یوه خپلواک او واک لرونکي نړیوال میکانېزم جوړولو غوښتنه کړې، چې د بشري حقونو سرغړونو، په ځانګړې توګه د ښځو په وړاندې د تاوتریخوالي د مرتکبینو پلټنه، مستند او محاکمه کول یې تر سره کړي.
د دې اعتراضي غورځنګ غړو ویلي، نړیواله ټولنه د افغانانو د آزادې رایې پر بنسټ د یوه مشروع او ټولګډونه سیاسي نظام د جوړولو ملاتړ وکړي او بشري حقونو او جنسیتي برابرۍ په اړه نړیوالو ژمنو ته ژمن پاتې شي.
معترضو ښځو ټينګار کړي، چې نړیواله ټولنه دې «د بشري حقونو د سرغړونو د مشروعیت مخنیوي لپاره پرېکنده ګامونه پورته کړي» او د بشري حقونو د سرغړونو قربانیانو په ځانګړې توګه د ښځو او نجونو خوندیتوب ته د لومړیتوب ورکړي.
دوی خبرداری ورکړی، چې د دې وضعیت دوام د بشري حقونو د بنسټیزو اصولو څخه ښکاره سرغړونه ده، له هغې جملې د ژوند حق، انساني کرامت، برابرۍ او عدالت ته لاسرسی او د بشري بحران، د جوړښتي تاوتریخوالي خپرېدو، د ټولنیز بې ثباتۍ زیاتوالي او جبري کډوالۍ لامل به شي.
