رابعه نسیمي، شهیره کریمي او پیمانه اسد درې افغان توکمه برېتانوي مېرمنې او د برېتانیا د کارګر ګوند غړو، د دې هېواد د سیمه ییزو شوراګانو په ټاکنو کې بریالي شوې.
رخشانه: د لند د سیمه یزو شوراګانو ټاکنې د پنشنبې او جمعې په ورځو (د غوايي ۱۷ او ۱۸ مه) تر سره شوې.
افغان – برېتانوي مېرمنې رابعه نیسمي د لندن د لوېدیځ سیمه ییزو شوراګانو په ټاکنو کې د ۱۲۰۰ رایو په تر لاسه کولو سره، یو له دریو بریالیو نوماندانو اعلان شوه.
هغې په خپله اېکس پاڼه لیکلي: «ډېره ویاړمو چې د ختیځ لپاره د کارګر ګوند د شورا د غړې په توګه، د اټیفن دانلی او هیتش تیلور تر څنګ وټاکل شوم. دا کمپاین اوږد او خورا ستونزمن وو او له زره ټولو هغو کسانو، چې پر ما یې باور کړی او رایه یې راکړې د زړه له تله منندویه یم.»
رابعه نسیمي په ۱۹۹۹ کې د طالبانو د لومړنۍ واکمنۍ پر مهال، هغه وخت چې پنځه کلنه وه، له خپلې کورنۍ سره یو ځای افغانستان پرېښود او برېتانیا ته کډواله شوه.
پیمانه اسد هغه بله افغان – برېتانوي وګړې ده، چې د لند د سیمه ییزو شوراګانو ټاکنو کې یې له بریا خوښي ښودلې ده.
هغې په خپله اېکس پاڼه لیکلي: «دا مې د ژوند تر ټولو سختې ټاکنې وې. خو بریالۍ شو. د دریمې دورې لپاره، یو ځل بیا د «راکست» ناحیې د استازې په توګه وټاکل شوم.»
مېرمن اسد پر دوام لیکلي: «دا پیغام هغو کسانو ته دی، چې له ما یې کرکه درلوده، همغه کسان چې خلکو ته یې ویل زه ریښتینې مسلمانه نه یم، زه یې صهیونسته بللم، ځکه چې پلار مې یو پښتو ژبی او د جنوب اوسېدونکی دی. ما ته یې د طالب خطاب کاوه او د بهرني سیاسیت په اړه یې د خبرو کولو د غلي کولو لپاره په مرګ ګواښلم.»
مېرمن اسد د رخشانې رسنۍ د خوندیتوب بورډ غړې هم ده.
شهیره کریمي یوه بله افغان-برېتانوي وګړې او د کارګر ګوند نومانده، د «پیټ شنکر» ناحیې د «ایلینګ» ښار شورا د غړې په توګه ټاکل شوې ده.
دا مېرمنې په داسې حال کې د کوربه هېواد په ټاکنو کې بریا ته رسي، چې د طالبانو تر واکمنۍ لاندې افغانستان کې ښځې، له خپلو لومړنیو انساني حقونو بې برخې دي. افغانستان په نړۍ کې یوازینی هېواد دی، چې نجونې نه شي کولی، له شپږم ټولګي پورته ښوونځي ته لاړې شي.
