افغان کډواله لوبغاړې فاطمه جعفري، د پاکستان د سوک وهنې څانګه کې، د پاکستان د «بلوچستان لپاره سولې» سوک وهنې سیالیو اتله شوه.
رخشانه: دا سیالۍ نن (یکشنبې د غوايي ۲مه) د یو شمېر پاکستاني لوبغاړو په ګډون په کویټه ښار کې تر سره شوې.
ټاکل شوې وه، چې فاطمه جعفري نن له خپلې پاکستانۍ سیالې سره د اتلولۍ ملابند تر لاسه کولو لپاره سیالي وکړي، خو د پاکستانۍ لوبغاړې د نه حاضرېدو له امله دغه لوبه تر سره نه شوه.
لوبڅارانو د پاکستانۍ لوبغاړې د نه حاضرېدو له آمله، بریا د جعفري په ګټه اعلان کړه او د دې سیالیو د اتلولۍ ملا بند د دې افغان لوبغاړې په نوم شو.
فاطمې جعفري تر اوسه پورې په خپلو مسلکي لوبو کې دوه بریاوې او یو د اتلولۍ ملا بند لري او پاکستان کې د مېشت پېژندل شوي افغان روزونکي بسم الله تاصیح تر روزنې لاندې، د فجر سوک وهنې په آکاډمۍ کې تمرین کوي.
جعفري په خپله فسبوک پاڼه لیکلي دي: «نن له ویاړه په ډک زړه او مننې، د اتلولۍ ملابند د سوک وهنې لوی کور فجر ته وړاندې کوم.»
هغې پرون د وزن اخیستو پړاو له تېرېدو وروسته په خپله فسبوک پاڼه لیکلي وو، چې د اتلولۍ د ملا بند تر لاسه کولو لپاره چمتو ده.
هغې ولیکل: «کوم لار چې تر نن پورې طی شوې ساده نه وه، شپې او ورځې په ډېرو سختو تمرینونو، فشار، ستړیا، درد او له ساه سره په مبارزې تېر شول، تر څو وکولی شم په بشپړ چمتوالي سره په دې لویو سیالیو کې حاضره شم.»
د «بلوچستان لپاره سوله» سیالۍ د Riayath Boxing Promotion له خوا پاکستان کې د یووالي او سوک وهنې څانګې د ودې په موخه تنظیم شوې وې.
دا افغان لوبغاړې نجلۍ په داسې حال کې د دې سیالیو اتله شوه، چې د طالبانو تر واک لاندې افغانستان کې ښځې او نجونې له هر ډول ورزش کولو بندې دي.
طالبانو د ۲۰۲۱ په اګست کې د بیا واک تر لاسه کولو وروسته، پر ښځو او نجونو د نورو محدودیتونو سربېره، هغوی له لوبو هم بندې کړې او د افغانستان د ښځینه لوبو لوبډلې یې منحل کړې.
