افغان ښځینه شاعره شمیم فروتن ایټالیا کې د «فرانکو لوی» نړیوالې ادبي فیستوال د اوولسمې جایزې ګټوونکې شوه.
رخشانه: د دې ادبي فیستوال ګټوونکي تازه د آیټالیا په «ګروتاماره» ښار کې وستایل شول.
شمیم فروتن په آیټالوي ژبه د یوه شعر په ویلو سره وتوانېده، چې د دې ادبي جشنوارې افتخاري دپلوم تر لاسه کړي.
د شمیم فروتن خاوند رفیع وفايي په خپله فسبوک پاڼه لیکلي، چې هغه د سلو ګډونوالو تر منځ د دې ادبي جایزې په ترلاسه کولو بریالۍ شوې ده.
وفايي لیکلي دي: «دا لویه لاس ته راوڼه دې تا او زموږ د ګران هېواد ټولو ښځو او نجونو ته مبارکه وي، هغه ښخې چې نن ورځ له خپلو ډېرو انساني او اساسي حقونو بې برخې دي، خو بیا هم ځلېږي.»
فرانکور لوی فیستوال یوه نړیواله ادبي پېښه ده، چې د آیتالوي او غیر آیټالوي لیکوالانو لپاره جوړېږي او موخه یې له معاصرو ادبیاتو، شعر او کیسو لیکولو ملاتړ دی.
شمیم فروتن د ۲۰۲۱ په اګست کې د طالبانو له بیا واکمنېدو مخکې، کابل کې د خبریالې په توګه فعالیت کاوه.
هغې په هېواد کې د جمهوریت له نسکورېدو او آیټالیا ته تر کډوالۍ وروسته، خپلو ادبي او کلتوري فعالیتونو ته دوام ورکړی دی.
طالبانو د تېر کال په اوړي کې د «مشاعرو د تنظیم» قانون توشېح کړ او د هغې له مخې، د مینې، انتقادي او د دې ډلې پر مشر ملاهبت الله د نیوکو کولو پر شعرونو بندیز ولګېده.
د طالبانو د «مشاعرو د تنظیم» په قانون کې راغلي، د مینې او د نجونو او هلکانو په باره کې شعرونه ویل بند دي او په شعرونو کې باید د نجونو او هلکانو له ستاینې او یا هغوی مینې ته له رابللو باید ډډه وشي.
د طالبانو د اطلاعاتو او کلتور وزارت په دې وروستیو کې د کندهار په (انارګل» مشاعره کې له شاعرانو وغوښتل، چې له «اسلامي امارت» نه د دفاع او ملاتړ شعرونه و وايي.
