نړیوالو رسنیو راپور ورکړی، چې د افغانستان ښځینه کرکټ ملي لوبډلې، جلا وطنه غړو د کرکټ له نړیوالې شورا (ICC) د رسمیت پېژندلو غوښتنه کړې.
رخشانه: ای بي سي نیوز نن (یکشنبې د غوايي ۲۰ مه) په یوه راپور کې لیکلي، دا غوښتنه تازه د افغانستان د ښځینه کرکټ ملي لوبډلې د غړو له خوا وړاندې شوې ده.
دوی د کرکټ له نړیوالې شورا غوښتي، چې د فوټبال نړیوال فدراسیون (فیفا) بېلګه تعقب کړي او دوی د یوې ملي لوبډلې په توګه په رسمیت وپېژني.
دا غوښتنه وروسته له هغې مطرح شوه، چې څه موده وړاندې فیفا اعلان وکړ، چې په جلا وطنۍ کې د افغان فوټبال ښځینه لوبډله په رسمیت وپېژندله او دا لوبډله کولی شي، د افغانستان په استازیتوب په نړیوالو لوبو کې ګډون وکړي.
واک ته د طالبانو تر بیا رسېدو وروسته، پر ښځو پراخو محدودیتونو هغوی، د زده کړې، کار او لوبو له حق څخه بندې کړې دي.
دغې ډلې د هېواد ټولې ملي لوبډلې منحل کړې او ویلي یې دي، ښځینه ملي لوبډلې په رسمیت نه پېژني.
ډېری لوبغاړو چې د هېواد د ملي لوبډلو غړیتوب لري، نورو هېوادونو ته پناه وړې ده.
په جلا وطنۍ کې د افغانستان د کرکټ ښځینه لوبډلې غړو، په دې وروستیو میاشتو کې په رونیزو کمپونو کې ګډون کړی او ټاکل شوې، د سکاټلېنډ په ادینبرو ښار کې د کرکټ نړیوالې شورا غونده کې هم حضور ولري.
تر اوسه د کرکټ نړیوالې شورا، د افغان کرکټ ښځینه لوبډلې غړو دې غوښتنې ته ځواب نه دی ویلی.
