کونړ کې سیمه ییز طالب چارواکي واييو د دې ولایت مرکز اسعد آباد ښار کې یو ماشوم په «بې رحمه» توګه وژل شوی دی.
رخشانه: کونړ کې د طالبانو د امنیه قوماندانۍ ویاند فرید دهقان وايي، د دې ماشوم جسد نن (یکشنبې د غوايي ۲۰مه) د دې ولایت مرکز کې موندل شوی دی.
دهقان زیاته کړې، دا ماشوم پنځه کلن وو او عثمان نومېده.
کونړ کې د طالبانو د امنیه قوماندانۍ ویاند ویلي، چې هغه پرون ماښام د دې ولایت مرکز د «نوآباد» سیمې څخه ورک شوی وو.
په ورته وخت د همدې سیمې دوه تنو اوسېدونکي د دې پېښې د پخلي تر څنګ ویلي، ناپېژانده کسانو له عثمان څخه «د چاقو پر مټ سرپرېکړی» او د هغه جسد یې د ښار په یوه څنډه کې غورځولی وو.
معلومه نه ده، چې دا ماشومان د چا له خوا او په څه دلیل وژل شوی دی.
د سیمې اوسېدونکو له طالبانو غوښتي، چې د دې وژنې عاملین پیدا او ویې نیسي.
طالبانو هم ادعا کړې، چې د دې وژنې د څرګندتیا لپاره یې خپلې پلټنې پیل کړې دي.
په دې وروستیو دوه اونیو کې د هېواد په یو شمېر ولایتونو کې جنايي پېښې بې مخینې زیاتې شوې دي.
