د «آزادۍ لپاره د افغان ښځو د یووالي غورځنګ» غړو په یوه اعتراضي لیک کې ویلي، افغانستان کې له ښځو سره د تاوتریخوالي او جرمونو په وړاندې چوپتا ظلم لا آسانه کوي.
رخشانه: د دې اعتراضي غورځنګ غړو نن (یکشنبې د غوايي ۲۰ مه) افغانستان کې په یوه اعتراضي غونډه کې، په هېواد کې له ښځو سره تاوتریخوالی او د هغوی د وژنې زیاتوالی وغانده.
د «آزادۍ لپاره د افغان ښځو د یووالي غورځنګ» غړې وايي، په هېواد کې له ښځو سره تاوتریخوالی او د هغوی وژنه غیر انساني او د نه توجیه وړ ده او په انساني ټولنه کې هېڅ ځای نه لري.
دوی هېواد کې د ښځو او نجونو په وړاندې د طالبانو پراخو محدودیتونو ته په اشارې ویلي «هېڅ پلمه نه پاتېږي، چې د یوه انسان د ژوند اخیستل توجیه کړي.»
معترضو ښځو د ښځو په وړاندې د تاوتریخوالي پای ته رسېدو، د عدالت د ټینګښت او د هغوی له انساني حقونو د جدي ملاتړ غوښتنه وکړه.
په دې وروستیو لسو ورځو کې د هېواد په یو شمېر ولایتونو کې د ښځو وژنې په بې مخینې توګه زیاتې شوې دي.
په هېواد کې د ښځو وژنې او ورسره تاوتریخوالی، د بشري او ښځو د حقونو د فعالانو او بنسټونو د اندېښنې لامل شوې دي.
