طلوع نیوز اعلان کړی، چې د دې رسنۍ دوه خبریالان، عمران دانش او منصور نیازی، کابل کې د طالبانو له خوا نیول شوي دي.
رخشانه: طلوع نیوز نن (یکشنبې د غوايي ۲۰ مه) په خپله فسبوک پاڼه د دې دوه خبریالانو د نیول کېدو موضوع شریکه کړې ده.
طلوع نیوز مشخصه کړې نه ده، چې دا دوه خبریالان په کوم دلیل او د کابل ښار په کومه برخه کې د طالبانو له خوا نیول شوي دي.
دې رسنۍ ویلي، طالبانو د دې دوه خبریالانو د نیولو پخلی کړی او د «اړونده قانوني پړاونو له طی کولو وروسته به په دې اړه نور جزیات خپاره کړي.»
د طلوع تلوېزیون مشر فریدالله محمدي څه موده وړاندې ارګ کې د طالبانو له لوري په یوه جوړه شوې ناسته کې ادعا وکړه، چې «هغه آزادي چې افغانستان کې حاکمه ده، په سیمه کې ساری نه لري.»
په وروستۍ یوه اوونۍ کې د طالبانو له خوا د خبریالانو نیونه زیاته شوې ده.
دوه ورځې وړاندې له افغان رسنیو د ملاتړ سازمان (امسو) اعلان وکړ، چې د طالبانو استخباراتي ځواکونو د «پیګرد خبري آژانس» مسوول احمد جاوید نیازی نیولی دی.
طالبانو په تېرو کابو پنځو کلونو کې په وار وار خبریالان او د رسنیو کارکوونکي او فعالان نیولي او په ځینو مواردو کې یې زنداني کړي هم دي.
د افغان خبریالانو مرکز اوونۍ وړاندې په یوه راپور کې اعلان وکړ، چې په تېر یوه کال کې یې د رسنیو له آزادۍ او د خبریالانو له حقونو د سرغړونو ۱۵۰ پېښې ثبت کړې دي.
د دې مرکز د راپور له مخې، څلور خبریالان لا هم د طالبانو په زندان کې شپې ورځې تېروي.
