«فنلنډ کې د هزاره کلتور کور» اعلان وکړ، چې د ریښو او اغېزو «Roots and Reflections» نندارتون د هزاره کلتوري میراث د سپړنې او لمانځې د پېژندنې په موخه فنلنډ کې جوړ شو.
رخشانه: دا نندارتون د شنبې په ورځ (د غوايي ۱۹ مه) د فنلنډ د «اسپو» ښار په «هیلینا راوتاوارا» موزیم کې جوړ شو.
دې نندارتون کې په هزاره کلتور پورې تړلي آثار او توکي چې په کې دودیزې ګاڼې، سیمه ییزې جامې، لاسي صنایع، دودونه او رواجونه، د موسقۍ آلې، تاریخي آثار او کلتوري توکي نندارې ته وړاندې شول.
د دې نندارتون ګډونوالو د کلتوري هویت ساتنې پر اهمیت، د ټولنو په کلتوري بډایتوب کې د کډوالو د رول په اړه بحث وکړ او د هغې د ساتنې په اهمیت یې ټینګار وکړ.
په دې نندارتون کې فنلنډ کې د مېشتو افغان کډوالو او کوربه هېواد د سیاسي، ټولنیزو او کلتوري څېرو په ګډون په جلا جلا ګردي مېزنو کې بحثونه هم تر سره شول.
د دې ګردي مېزنونو ګډونوالو هر یوه د هزاره ګانو او هزارګي کلتور څخه د پېژندنې په اړه خپلې تجربې له مخاطبینو سره شریکې کړې او د کډوالو ټولنې د هویت په ساتلو کې د کلتور رول، د کلتوري خبرو اترو اهمیت، د کډوالۍ ننګونې او د فنلنډ د کلتوري تنوع په پیاوړتیا کې د هزاره ټولنې د ونډې په اړه خبرې اترې وکړې.
د دې نندارتون جوړونکو د فیض محمد کاتب هزاره له خوا لیکل شوی «سراج التواریخ کتابونه او د محمد ګلزاري له خوا د «امیرعبدالرحمان په دوره کې د هزاره ګانو د قتل عام او ځورونې» ترتیب شوی کتاب، د افغانستان د تاریخ مهم کتابونه او سرچینې معرفي کړې.
د نندارتون په یوه برخه کې د آزر ځمکې لرغوني آثار» مستند فلم، چې د هزاره ګانو ژوند او د هغوی دودونه او رواجونه انځوروي، نندارې ته وړاندې شو.
فنلنډ کې د هزاره ګانو کلتوري کور ویلي، د ریښو او انعکاسونو نندارتون به د آګست میاشتې تر پای پورې د لیدونکو پر مخ پرانستی وي.
