افغانستان کې د ملګرو ملتونو د سیاسي استازولۍ دفتر (یوناما) په خپل راپور کې لیکلي، د روان میلادي کال د جنورۍ له اولې د مارچ تر ۳۱ مې، د طالبانو او پاکستان تر منځ سرحدي نښتو کې، ۳۷۲ ملکي افغانان وژل شوي او ۳۹۷ نور ټپیان شوي دي.
رخشانه: یوناما په خپل تحقیقي راپور کې چې نن (سه شنبې د غوايي ۲۲مه) یې خپور کړی ویلي، یوازې ۲۶۹ تنه کابل کې د نشه یانو د درمنلې په امید مرکز د پاکستان په هوايي برید کې وژل شوي او د یوې ښځې په ګډون ۱۲۲ تنه نور ټپیان شوي دي.
د یوناما د راپور له مخې، دا شمېر کسان د افغانستان پر خاوره د پاکستان د ۹۵ هوايي او راکټي بریدونو کې قرباني شوي. قربانیانو کې ۷۲ تنه ښځې، ۵۵۴ تنه نارینه، ۴۸ نجونې او ۹۵ هلکان شامل دی.
یوناما لیکلي، دا کسان په نورستان، کندهار، پکتیا، پکتیکا، خوست، ننګرهارو کونړ او کابل ولایتونو کې د پاکستان د هوايي او راکېټي بریدونو او د پاکستان او طالبانو تر منخ سرحدي نښتو کې قرباني شوي دي.
دې بنسټ زیاته کړې، چې کابل ښار کې د امید د نشه یانو د درملنې په مرکز د مارچ د ۱۶ مې تر برید وړاندې، د ثبت شویو ملکي مرګ ژوبلې له نیمايي زیات ښځې او ماشومان جوړوي.
دغه دفتر وايي، د دې پېښې ډېری قربانیان په نشه يي توکو روږدي کسان وو، چې په دې مرکز کې تر درملنې لاندې وو.
راپور راوړي، دا روغتون د پاکستان تر درې هوايي بریدونو لاندې راغلی دی. په دې بریدونو کې ۲۶۹ تنه وژل شوي او ۱۲۲ نور ټپیان شوي دي.
یوناما په خپل راپور کې وايي، د دې پېښې د ځینو قربانیانو جسدونه، د ژورو ټپونو او سوځېدو له امله د پېژندو وړ نه وو. یو شمېر کورنۍ لا هم د خپلو قربانیانو د جسدونو په موندلو نه دي بریالي شوي.
طالبانو کابل ښار کې د نشه یانو د درملنې په امید مرکز د پاکستان د هوايي بریدونو مرګ ژوبله، ۴۱۱ وژل شوي او ۲۶۱ ټپیان اعلان کړي دي.
کابل کې د پاکستان سفارت د یوناما دې راپور ته په ځواب کې ویلي، پاکستاني ځواکونو کابل ښار کې «ترهګریز تاسیسات او بنسټونه» په نښه کړي دي.
همدارنګه یوناما په خپل راپور کې لیکلي، د روان میلادي کال د مارچ په ۱۹ مه د نورستان ولایت د کامدېش ولسوالۍ په روغتیايي مرکز کې، په یوه غیر دولتي بنسټ پورې تړلې روغتیايي ښځینه کارکونکې د پاکستاني ځواکونو په ډزو و وژل شوه.
دا مېرمن له خپلې کورنۍ سره کونړ ولایت ته د تګ په حال کې وه، چې لېږدونکی موټر یې د نورستان په کامدېش ولسوالۍ کې د پاکستاني ځواکونو تر برید لاندې راغی او و وژل شوه.
یوناما له ښکېلو غاړو غوښتي، چې نړیوالو بشري حقونو ته په درناوي، په غیرنظامیانو له برید کولو ډډه وکړي.
