فرانسه کې اوسېدونکې افغان پاراتکواندوکاره زکیه خدادي د دویم ځل لپاره د اروپا د ۲۰۲۶ کال د پاراتکواندو سیالیو اتله شوه او د دې سیالیو د سرو زرو مډال یې په غاړه کړ.
رخشانه: د «مونیخ ۲۰۲۶ یورو تکواندو» سیالۍ د می میاشتې په ۱۱ مه، د المان مونیخ ښار کې پیل او د مي په ۱۴ مه پای ته رسېږي.
زکیې خدادي آیټالیايی، ګرجستاني او ترکیه سیالانو ته په ماتې ورکولو سره، د اروپا اتلولۍ لوبو په لومړي مقام ودرېده.
هغې په دې سیالیو کې د منفي ۴۷ کیلوګرامه وزن سره ګډون وکړ او په وروستۍ لوبه کې خپل ترکي سیالې ته په ماتې ورکولو سره اتله شوه.
خدادادي په خپله انسټاګرام پاڼه د څو انځورونو په خپرولو سره د خپلې اتلولۍ خبر ورکړی دی.
زکیه خدادادي تېر پسرلي کې د برازیل هېواد د پاراتکواندو اوپن (Rio Open G2 2025) لوبو کې د برونزو مډال وګاټه.
خدادادي لومړنۍ افغان لوبغاړې ده، چې د ۲۰۲۰ توکیو پاراالمپیک سیالیو کې یې ګډون وکړ او د دې ورزشي سیالیو د زړورې ښځې لقب یې خپل کړ.
هغه تر دې وړاندې د اروپا د پاراتکواندو سیالیو کې د سروزورو مډال، د ۲۰۲۲ کال په نړیوال ګرانډ پرې کې د برونزو مډال، البانیا کې په نړیوالو سیالیو کې د سپینو زرو مډال او په ۲۰۱۶ کال کې د مصر د پاراتکواندو سیالیو کې د برونزو مډال په غاړه کړی دی.
خدادادي د افغان مېرمنو له حقونو په ځانګړې توګه د نجونو د زده کړې او لوبو د ملاتړ له امله، د نړیوالې پاراالمپیک کمېټې د ۲۰۲۵ کال د ښځو د نړیوالې ورځې جایزې د ابهرونکې رهبرۍ کټګورۍ ګټونکې وه.
طالبانو په افغانستان کې د نورو محدودیتونو تر څنګ ښځې له لوبو څخه بندې کړې دي. دې ډلې ویلي، ښځینه لوبغاړې په رسمیت نه پېژني او د هېواد ټولې ملي ښځینه لوبډلې یې منحل کړې دي.
