ننګرهار او کونړ ولایتونو کې د ناچاودو توکو د چاودنو له امله، د پنځو ماشومانو، یوې ښځې او یوه نارینه په ګډون د اوو تنو ژوند واخیست او یو بل ماشوم ټپي شوی دی.
رخشانه: ننګرهار کې د طالبانو د امنیه قوماندانۍ ویاند سید طیب حماد وايي، د دې ولایت ګوشتې ولسوالۍ کې د جګړو مهال د راکټ پاتې شوې مرمۍ د چاودنې په ترڅ کې یوه ماشوم ژوند له لاسه ورکړی او یو بل ماشوم ټپی شوی دی.
ننګرهار کې د طالبانو د امنیه قوماندانۍ ویاند زیاته کړې، دا چاودنه نن سهار (پنشنبې د غوايي ۲۴ مه) د ګوشتې ولسوالۍ د «دورخیل» په کلي کې رامنځ ته شوې ده.
نوموړي ویلي، ماشومان د څارویو څرولو لپاره یوه نېږدې غره ته تللي و، چې د راکټ د یوې ناچاودې مرمۍ سره د لګېدو په چاودنه کې مړه او ټپیان شول.
ټپي ماشوم د ګوشتې ولسوالۍ روغتون ته لېږدول شوی او روغتیايي حالت یې ښه دی.
په ورته وخت کونړ کې یوې سرچینې د هویت پټ ساتلو سره ویلي، د دې ولایت «ماڼوګي» ولسوالۍ کې د ناچاودو توکو په چاودنه کې، درې ماشومان، یوه ښځه او یو نارینه وژل شوي دي.
د سرچینې په وینا، دا پېښه د چهارشنبې په شپه (د غوايي ۲۳ مه) شاوخوا ۹ بجې د ماڼوګي ولسوالۍ په «کنده ګل» کلي کې رامنځ ته شوې ده.
سرچینې زیاته کړې، د دې پېښې قربانیان د یوې کورنۍ غړي وو او د کور ودانۍ په بشپړه توګه ویجاړه شوې ده.
کونړ کې طالب چارواکو تر اوسه د دې پېښې په اړه څه نه دي ویلي.
په ټول هېواد کې د جګړې مهال د پاتې شویو ناچاودو توکو چاودنې، هر کال له خلکو قرباني اخلي. د دې پېښو ډېری قربانیان ماشومان دي.
