د بشري حقونو د څار سازمان وايي، د امریکا د بهرنیو مرستو کمېدل، په ټوله نړۍ کې بشري حقونه او بې شمېره کسان چې له ګواښ سره مخ دي، زیانمنوي.
رخشانه: دې بنسټ نن (پنشنبې د غوایي ۲۴ مه) په یوه راپور کې لیکلي، پالیسي جوړونکي او مالي مرسته کوونکي باید له بشري حقونو او له ګواښ سره مخ کسانو ملاتړ بېرته ورغوي.
د بشري حقنو څارډلې زیاته کړې، امریکا په ۲۰۲۵ کال کې خپلې ټولې بهرنۍ مرستې په ناڅاپي ډول بندې کړې، هغه ګام چې بشري حقونو او له خطر سره مخ بې شمېره کسانو ته یې زیان رسولی دی.
دې بنسټ په ۱۶ هېوادونو، له هغې جملې په افغانستان کې د رسنیو پر آزادۍ، اطلاعاتو ته د لاسرسي او ډېجیټل امنیت، هدفي تاوتریخوالي او سرغړونې سره مقابلې او همدارنګه په عدالت، ځواب وینې او قانون پر حاکمیت د مرستو کمېدو اغېزې څېړلې دي.
د بشري حقونو څارډلې ویلي، د امریکا د بشري مرستو د بندېدو په پایله کې، «د بشري حقونو د سرغړونو په اړه پلټنې درېدلې، له قربانیانو ملاتړ پرې شوی او هغه سازمانونه چې د بشري حقونو د سرغړونو په مخنیوي کې یې مرسته کوله، اړ شوي، چې خپل فعالیتونه کم کړي یا یې وتړي.»
واشنګټن کې د بشري حقونو د څارډلې دفتر مدیرې سارا یاګر ویلي دي «په بهرنیو مرستو کې کمښت د بشري حقونو د سرغړونو ثبت او مستند کول، په خطر کې د ټولنو ساتنې او د بشري حقونو د سرغړونکو ته حساب ورکول ګران کړي دي.»
هغې زیاته کړې: «د امریکا دولت په چټکه او پراخه توګه د مرستو کمولو سره، د ډېری هغو کسانو د ژغورنې لار، چې ناوړه ګټې اخیستنې او د بشري حقونو له سرغړونو سره مخ دي، له منځه وړی دی.
د بشري حقونو څار ډلې ویلي، هېڅ حکومت په قانوني توګه د بهرنیو مرستو په چمتو کولو مکلف نه دی، خو هغه لار چې امریکا د مرستو کمولو برخه کې ونیوه، د پام وړ زیان اړولی او ځواب وینې ته اړتیا لري.
دې بنسټ زیاته کړې، د امریکا کانګرس باید په ۲۰۲۵ کال کې د بودیجې کمولو او پروګرامونو تړلو د بشري حقونو اغېزو ارزولو لپاره یوه خپلواکه بیا کتنه وکړي او په راتولنکو بودیجو کې د بشري حقونو د فعالیتونو لپاره تمویل بېرته رامنځ ته کړي.
همدارنګه د بشري حقونو څار ډلې ویلي، پالیسي جوړونکي، مرستنه کوونکي دولتونه او خصوصي بنسټونه باید د بشري حقونو د نړیوال غورځنګ لپاره د ملاتړ د بیا رغونې په موخه سملاسي او دوامداره توګه د بشري حقونو د درناوي پر بنسټ ګام پورته کړي.
