افغانستان کې د ملګرو ملتونو د سیاسي استازولۍ (یوناما) دفتر، کابل کې د طالبانو له لوري د «نامعلوم تور په دلیل» د دریو خبریالانو په نیولو اندېښنه ښودلې ده.
رخشانه: یوناما نن (پنشنبې د غوايي ۲۴ مه) په خپله فسبوک پاڼه د یوه پوسټ په خپرولو سره، د دې خبریالانو د نیول کېدو په اړه د «وضاحت غوښتنه» کړې ده.
یوناما لیکلي: «د طالبانو له خوا د تلاشۍ پر مهال په خبریالانو د بریدونو او د هغوی د توکو د ضبطولو په راپورونو هم اندېښمن دي.»
دې بنسټ «د خبریالانو په وړاندې د قانوني اساس او تورونو په اړه وضاحت او په ټولو قضیو کې د مناسبې پروسې او د دوی حقونو ته د درناوي غوښتنه هم کړې ده.»
افغانستان کې د یوناما دفتر ویلي «آزاد، خپلواک او خوندي مطبوعات، د روڼتیا، حساب ورکولو او د افغاني ټولنې د سلامتیا ډاډمنولو لپاره اړین دي.»
یوناما له طالبانو غوښتي، چې د بشري حقونو د نړیوال قانون پر اساس د خپلو مکلفیتونو په رعایت کولو سره ډاډ ورکړي، چې خبریالان کولی شي، له وېرې، ډار، ځورونې او غچ اخیستونکو اقداماتو پرته خپلې دندې تر سره کړي.
طلوع نیوز د یکشنبې په ورځ په خپله اېکس پاڼه د یوه پوسټ په خپرولو سره لیکلي، چې طالبانو د دوی د رسنۍ دوه تنه خبریالان منصور نیازی او عمران دانش نیولي دي.
له هغې مخکې د «پیګرد» خبري آژانس مسوول جاوید نیازی هم په کابل ښار کې د طالب استخباراتو له خوا نیول شوی وو.
د خبریالانو د خوندیتوب کمېتې آسیايي څانګې (CPJ-Asia) دوه ورځې مخکې اعلان وکړ، چې د طلوع نیوز د دوه خبریالانو د نیولو کېدو خبر له خپرېدو وروسته، د طالبانو استخباراتو د دې رسنۍ په دفتر یرغل کړی، د کارکوونکو تلېفونه یې ترې ضبط کړي او له هغوی یې پوښتنې ګروېږنې کړې دي.
د طالبانو د اطلاعاتو او کلتور وزارت نن تایید کړې، چې د طلوع نیوز دوه خبریالان د دوی د امنیتي ځواکونو له خوا نیول شوي او د دې خبریالانو دوسیې تر څېړنې لاندې دي.
دې وزارت نه ده مشخصه کړې، چې دا دوه خبریالان په کوم دلیل د طالبانو له خوا نیول شوي او دا مهال چېرته ساتل کېږي.
طالبانو د ۲۰۲۱ په اګست کې بیا واک ته تر رسېدو وروسته، په خبریالانو او خپلواکو رسنیو د محدودیتونو په لګولو سره، په هېواد کې د رسنیز فعالیت کړۍ را تنګه کړې ده.
دې ډلې په تېرو کابو پنځو کلونو کې، په هېواد کې لسګونه رسنۍ تړلې او څو خبریالان، رسنیز کارکوونکي او فعالان یې نیولي او زنداني کړي دي.
د دې محدودیتونو په لګولو سره، ګڼ شمېر خبریالان او د رسنیو کارکوونکو او فعالانو هېواد پرېښودی دی.
