حبیبه صالحي ته، هغه ځوانه ښځه چې څو ورځې وړاندې هرات کې د طالبانو له خوا نیول شوې وه، یوه نېږدې سرچینه وايي، هغه پرون د پیسو په بدل کې خوشې شوې ده.
رخشانه: دې سرچینې چې نه یې غوښتل هویت یې څرګند شي، نن (جمعه د غوايي ۲۵ مه) رخشانې رسنۍ ته ویلي، حبیبه تېره شپه اته بجې د هرات د قومي مخورو په منځګړیتوب، په دې ولایت کې د طالبانو د استخباراتو له زندان څخه خوشې شوه.
دې سرچینې زیاته کړې، د حبیبې کورنۍ د هغې د خوشي کېدو لپاره شاوخوا یو سل اتلس زره افغانۍ لګولې او په څو ځایونو کې یې طالب چارواکو ته پیسې ورکړې دي.
د سرچینې له قوله، طالب ځواکونو زندان کې له حبیبې سره ناسم چلند کړی او هغې یې ته یې توهین او سپکاوی کړی دی.
د سرچینې په وینا، دا ځوانه ښځه په ټولنیزو شبکو د فعالیت او د طالبانو د نظام پر ضد پوسټونو کولو له امله نیول شوې وه.
مېرمن صالحي چې د خبریالۍ مخینه لري د (چهارشنبې غوايي ۲۳ مه) سهار د هرات ښار د «نمبریک» سیمې څخه ونیول شوه. هغه واک ته د طالبانو تر رسېدو مخکې هرات کې د «دنیای نو» تلوېزیون د یوې خپرونې چلوونکې وه.
مېرمن صالحي دوه اوونۍ وړاندې له ترکیې و هرات ته د خپلې کورنۍ لیدو ته راغلې وه.
دوه ورځې وړاندې د حبیبې صالحي تر نیول کېدو وروسته، د هغې خپلوانو د دې د موندلو لپاره هرات کې د طالبانو امنیتي ارګانونو ته مراجعه کړې وه، خو دې ډلې د هغې د نیولو څخه بې خبري ښودلې وه.
