بامیانو کې سیمه ییزه سرچینې وايي، دې ولایت کې د طالبانو محلي ادارې د تازه پرېکړې له مخې، نجونو او هلکان باید په جلا وختونو کې د زده کړو مرکزونو ته ولاړ شي.
رخشانه: بامیانو کې لږ ترلږه دریو سرچینو رخشانې رسنۍ ته ویلي، دا محدودیت د تېرې اوونۍ د چهارشنبې له ورځې (د غوايي ۲۳ مې) راهیسې لګول شوی دی.
د ځايي سرچینو په وینا، بامیانو کې د طالبانو محلي ادارې ښوونیزو مرکزونو ته ویلي، له دې وروسته باید هلکان له غرمې مخکې او نجونې له ماسپښین وروسته ښوونیزو مرکزونو ته ورشي.
سرچینې زیاته کړې، د دې وخت بندۍ پر اساس هلکان یوازې د سهار له مخې، تر دولسو بجو او نجونې له یوې د مازیګر تر څلورو پورې ښوونیزو مرکزونو ته د ورتګ حق لري.
بامیانو کې د طالبانو د محلي ادارې د تازه پرېکړې له مخې، هېڅوک حق نه لري، چې له ټاکل شویو وختونو پرته ښوونیزو مرکزونو ته ولاړ شي.
طالبانو بامیانو کې د ژبې او نور زده کړو زده کوونکي هلکان او نجونې ګواښلي او ورته ویلي یې دي، که څوک له پرېکړې سرغړونه وکړي، وبه نیول شوي.
سرچینو رخشانې رسنۍ ته ویلي، طالبانو د تېرې اوونۍ د چهارشنبې او پنشنبې په ورځو د بامیانو مرکز کې ټول ښوونیز مرکزونه د دوه ورځو په مخه تړلي وو.
د طالبانو د ځايي ادارې له خوا د دې محدودیت لګول، بامیانو کې د زده کړو او ژبې د زده کوونکو د اندېښنې لامل شوي دي.
په ورته وخت یوې بلې خبرې سرچینې د هویت پټ ساتلو سره رخشانې رسنۍ ته ویلي، طالبانو کابو څلوېښت ورځې وړاندې د بامیانو مرکز ښار د «سرخ قول» سیمه کې د «ستارګان» په نوم د نجونو خصوصي ښوونځي تړلی دی.
د سرچینې په وینا، دا ښوونځی یوازې د «نجونو د زده کړې» په دلیل تړل شوی دی.
د رخشانې رسنۍ سرچینې ادعا کړې، چې د طالبانو معارف ریاست ښاري امر عبدالله جویا، بامیانو کې د خصوصي ښوونځیو د ټولنې له رییس سره، د ستارګان خصوصي ښوونځي د خلاصولو په بدل کې، د دې ښوونځي له مسوول څخه ۵۰ زره افغانۍ نغدې بډې اخیستې، خو تر اوسه دا ښوونځی تړلی دی.
تر اوسه بامیانو کې د طالبانو د ځايي ادارې چارواکو په دې اړه څه نه دي ویلي.
طالبانو په تېرو کابو پنځو کلونو کې سره له دې، چې د ښځو او نجونو په زده کړو او تحصیل یې سخت محدودیتونه لګولي، په وار وار یې ښوونیز مرکزونه، چې نجونې ورته د زده کړې په موخه مراجعه کوي تړلي دي.
