د ملګرو ملتونو د خوړو نړیوال پروګرام (WFP) افغانستان کې، د خوارځواکۍ بحران د شدت په اړه خبرداری ورکړی وايي، دې بحران میندې او ماشومان د له منځه تلو پولې ته رسولي دي.
رخشانه: دې بنسټ پرون شنبې (د غوايي ۲۶ مه) په یوه اعلامیه کې لیکلي، افغانستان په وروستیو کلونو کې د خوارځواکۍ له یوې لوړې کچې سره مخ دی او کابو پنځه میلیونه میندو او ماشومانو ترې زیان لیدلی دی.
د ملګرو ملتونو د خوړو نړیوال پروګرام زیاته کړې، له ګاونډیو هېوادونو د ګډوالو پراخې راستنېدنې او د بودیجې کمښت، افغانستان کې بشردوستانه فعالیتونه له توان وتلي خنډني کړي دي.
د ملګرو ملتونو د خوړو نړیوال پروګرام اجرائیوي مرستیال کارل اسکاو افغانستان ته د خپل سفر په پای کې ویلي «د خوړو نړیوال پروګرام میاشتې کېږي، چې [افغانستان کې] یې د خطر زنګ کړنګولی دی.»
هغه زیاته کړې: «دا اوونۍ مې له هغو په خوارځواکۍ اخته میندو او ماشومانو سره ولیدل، چې دوه ساعته سفر یې کړی وو، تر څو د خوړو نړیوال پروګرام تر ملاتړ لاندې د درملنې یوه مرکز ته ورسېږي، خو په دې دلیل، چې د خوړو وړاندې کولو لپاره مو بشپړه غذا نه درلوده، د هغوی له قبلولو مو ډډه وکړه.»
د ملګرو ملتونو د خوړو نړیوال پروګرام اجرائیوي مرستیال زیاته کړې «ما له یوازې میندو او له هغه کورنیو سره چې نوزېږدي یې درلودل لیدنه وکړه، هغوی، خوړو، سرپناه، امنیت او بېړني ملاتړ ته اړتیا لري.»
دې بنسټ ویلي، روان کال شاوخوا ۵۰۰ زره نور کسان له پاکستان او ایران څخه افغانستان ته ستانه شوي، ډېری له دې کورنیو له سختو ستونزو سره لاس او ګرېوان دي.
د خوړو نړیوال پروګرام خبرداری ورکړی، چې د بسپنه ورکوونکو له بېړنیو او چټکو بشردوستانه مرستو پرته، «نشو کولی [افغانستان کې] د میلیونونه میندو او ماشومانو لپاره د یو انساني ناورین د رامنځ ته کېدو مخنیوی وکړو.»
ملګرو ملتونو ویلي، په افغانستان کې د خپلو ژغورونکو عملیاتو د دوام لپاره په راتلونکو شپږو میاشتو کې ۳۵۰ میلیونه ډالر بودیجې ته اړتیا ده.
د خوړو نړیوال پروګرام وايي، پر دې بحرانونو سربېره، په افغانستان کې له بشري حقونو او د رسنیو له خپلواکۍ هم سرغړونې زیاتې شوې دي.
دې بسټ زیاته کړې، په افغانستان کې انساني وضعیت خرابېدل په داسې حال کې رامنځ ته کېږي، چې په دې هېواد کې د حقونو او مدني خپلواکیو په اړه پراخې اندېښنې شتون لري.
