فراه کې د طالبانو امنیه قومانداني وايي، د دې ولایت فراه رود ولسوالۍ کې یو ماشوم هلک، د یوه بل هلک په «غیرقصدي» ډزو وژل شوی دی.
رخشانه: فراه کې د طالبانو امنیه قوماندانۍ نن (دوشنبې د غوايي ۲۸ مه) په یوه خبرپاڼه کې ویلي، دې هلک په یوه دوکان کې شاګردي کوله او د دوکان د خاوند هلک له خوا وژل شوی دی.
خبرپاڼه کې راوړل شوي، دا ماشوم ۱۴ کلن وو او عبدالحی نومېده.
د خبرپاڼې له مخې، دې ماشوم په یوه دوکان کې شاګردي کوله او د دوکان د خاوند د زوی له خوا د تومانچې په خطايي ډزو وژل شوی دی.
خبرپاڼه کې لیکل شوي: «د دوکان د څېښتن ماشوم زوی، د خپل پلار تومانچه اخیستې او په غیر قصدي ډول یې د هغه په لور ډزې کړې، چې په ترڅ کې یې عبدالحی په نښه شوی او د سختو ټپونو له امله ځای پر ځای ساه ورکړې.»
طالبانو ویلي، د دوکان د خاوند زوی د پېښې په تړاو نیول شوی او دوسیه یې د پلټنو لپاره د دې ډلې عدلي او قضايي ارګانونو ته سپارل شوې ده.
دا په داسې حال کې ده، چې د تېرې اوونۍ د پنشنبې په ورځ بادغیس ولایت کې هم یو هلک په غیر قصدي ډزو وژل شوی وو.
