له «پولیو پاک افغانستان» پاڼې اعلان کړی، چې د دې هېواد په ۲۰ ولایتونو د پولیو یا د ماشومانو د ګوزڼ واکسین نوې لړۍ پیل شوه.
رخشانه: دا کمپایني لړۍ چې نن (دوشنبې د غوايي ۲۸ مه) پیل شوې، شاوخوا څلور ورځې به دوام ولري.
په دې لړۍ کې به د دې هېواد د ۲۰ ولایتونو په ۱۹۴ ولسوالیو کې، تر پنځو کلو کم عمره شاوخوا ۸.۳ میلیونه ماشومان واکسین شي.
له پولیو پاک افغانستان پاڼې لیکلي، د هېواد په سویل کې به د پولیو واکسین کمپاین سبا ته پیل شي.
دې پاڼې له خلکو غوښتي چې «له پولیو ناروغۍ د پاک افغانستان لپاره خپله ونډه تر سره کړي.»
دا په روان میلادي کال کې، د پولیو واکسین پلي کولو دویمه لړۍ ده، چې د روغتیا نړیوال سازمان او د روغتیا په برخه کې د نورو بنسټونو له خوا په هېواد کې پلې کېږي.
افغانستان او پاکستان په نړۍ کې یوازیني هېوادونه دي، چې تر اوسه د پولیو په ریښو ایستلو نه دي بریالي شوي.
تر اوسه پورې په هېواد کې د پولیو کومه مثبته پېښه نه ده ثبت شوې.
تېر میلادي کال په هېواد کې د ماشومانو د ګوزڼ لږ تر لږه ۹ پېښې ثبت شوې وې.
