د بي بي سي نړیوالې څانګې په یوه هیښوونکي راپور کې لیکلي، د افغانستان لوېدیځ غور ولایت اوسېدونکي، د بېوزلۍ او تنګلاسۍ له امله او د ژوندي پاتې کېدو لپاره، خپل ماشومان پلوري.
رخشانه: د بي بي سي په دې راپور کې، چې تازه خپور شوی راغلي، د بېوزلۍ سربېرته د خوارځواکۍ له امله د ماشومانو مړینه هم په تېرو دوه کلونو کې په غور ولایت کې زیاته شوې ده.
بي بي سي په خپل راپور کې غور یو د افغانستان له تر ټولو زیان لیدونکې سیمه بللې لیکلي یې دي، په دې ولایت کې بېوزلي او اقتصادي ستونزې د دې لامل شوې، چې د دې ولایت په مرکز کې ډېری کورنۍ څوپرلپسې شپې په لوږه تېرې کړي.
د غور یوه اوسېدونکي بي بي سي ته ویلي، په تېره یوه اوونۍ کې یې یوازې درې ورځې د ۱۵۰ تر ۲۰۰ افغانیو په بدل کې کار کړی او ماشومان یې درې پرلپسې شپې وږي ویده شوي دي.
د غور ولایت یوه اوسېدونکي عبدالرشید عظیمي بي بي سي ته ویلي، اړ دی، چې د کورنۍ د غړو د ژوندي پاتې کېدو په موخه خپلې غبرګونې اته کلنې لوڼې د واده او یا هم د کور کارونو د تر سره کولو لپاره وپلوري.
دې سړي ویلي: «چمتو یم چې لوڼې مې وپلورم. بېوزه، پوروړی او د بل در ته پاتې یم، که یوه لور مې وپلورم، لږ تر لږه د څلورو کلونو لپاره پاتې اولادونه پرې ماړه کړم.»
بي بي سي په خپل راپور کې لیکلي «د غور ولایت اوسېدونکی سعید احمد اړ شوی، چې خپله پنځه کلنه لور وروسته له هغې، چې په آپنډېیس ناروغۍ اخته شي، یوه خپل قومي ته د دوه سوه زره افغانیو په بدل کې وپلوري.»
دې سړي ویلي دي: «د لور د درملنې لپاره مې پیسې نه درلودې. اړ شوم چې هغه په یوه خپلوان وپلورم. هغه ته مې و ویل، چې فعلآ مې یوازې د لور د درملنې پیسې راکړه او پاتې نورې په راتلونکو پنځو کلونو کې راکړه، وروسته له هغې کولی شې هغه بوځې.»
بي بي سي د خپل راپور په یوه برخه کې لیکلي، د غور ولایتي روغتون د نوزېږدو څانګه د دغه روغتون تر ټولو له ګڼې ګوڼې ډکه برخه ده. ټول بسترونه ډک دي او په ځینو بسترونو دوه دوه نوزېږدي اچول شوي دي.
د غور ولایتي روغتون کې یوې نوکروالې نرسې ویلي، ځینې ورځې ان تر دریو نوزېږدو په دغه روغتون کې ژوند له لاسه ورکوي.
د غور ولایتي روغتون د نوزېږدو ماشومانو څانګې مسوول ډاکتر محمد موسی ویلي دي، د ماشومانو د مړینې کچه کله کله ۱۰ سلنې ته ورسېږي، چې دا وضعیت د «منلو نه دی».
هغه زیاته کړې، د درملنې لپاره د ناروغانو د مراجعې سره سره، د نوزېږدو په څانګه کې، د هغوی د درملنې لپاره لازم درمل شتون نه لري.
د غور ولایتي روغتون د نوزېږدو څانګې یوې نرسې ویلي دي، ډېری کورنۍ د اقتصادي ستونزو له امله، خپل ناروغان کور ته وړي.
د طالبانو بیا واک ته تر رسېدو او له هېواد سره د بهرنیو مرستو د کمېدو وروسته، انساني وضعیت خورا خراب شوی دی.
د ملګرو ملتونو د شمېرو له مخې، په افغانستان کې له هرو څلورو تنو درې هغه یې د خپل ژوند د لومړنیو اړتیاوو په پوره کولو قادر نه دي.
پر دې سربېره هېواد کې بېکاري پراخه ده، روغتیايي وضعیت په بحراني حالت کې دی او بشردوستانه مرستې هم کمې شوې دي.
د ملګرو ملتونو د خوړو نړیوال پروګرام (WFP) دوه ورځې وړاندې په افغانستان کې د خوارځواکۍ په اړه خبرداری ورکړ او یې لیکل، دې بحران میندې او ماشومان د لمنځه تلو تر پولې رسولي دي.
