د خبریالانو د خوندیتوب کمېټې (CPJ) د افغان ګډوالو په اړه د خبرو اترو لپاره، بروکسل ته د طالب چارواکو د سفر لغوه کولو غوښتنه کړې ده.
رخشانه: دې بنسټ تازه په یوه اعلامیه کې لیکلي، اروپايي ټولنه په دې اقدام سره هغه نظام ته، چې د آزادیو ځپلو مسوول دی مشروعیت ورکوي او د نړیوالو لوبغاړو په توګه د طالبانو اړیکې پياوړې کوي.
د خبریالانو د خوندیتوب کمېتې ویلي، اروپايي ټولنه په رسمي ډول طالبان په رسمیت نه پېژني او هر ډول رسمي تعامل یې تر یوه بریده د نړیوالو بشري حقونو په معیارونو پورې تړلی دی.
د خبریالانو خوندیتوب کمېټه کې د اروپايي ټولنې د حق غوښتنې برخې مرستیال ټام ګیبسون د اروپايي ټولنې له خوا د افغان کډوالو د ایستلو په اړه د خبرو اترو لپاره د طالب چارواکو غوښتل له «شرمه ډک» کار بللی دی.
هغه ویلي: «دا شرمونکې ده، په داسې حال کې، چې طالبان په رسنیو بریدونه کوي، خو اروپايي ټولنه هغوی بروکسل ته ورغواړي. په دې کار سره هغه رژیم ته، چې د سختو ځپلو او سانسور مسوول دی مشروعیت ورکول کېږي او د نړیوالو لوبغاړو په توګه د هغوی تبلیغاتي مقام پیاوړی کېږي. اروپايي کمېسیون باید دا ډول پروګرامونه لغوه کړي.»
له دې وړاندې د اروپايي ټولنې د پارلمان غړې هانا نیومن ویلي وو، د طالبانو تر واک لاندې افغانستان ته له اروپا څخه د افغان کډوالو ایستل، «نه یوازې یوه انساني ماتې» بلکې د مشرتابه تېروتنه ده.
هغې ویلي وو: «که اروپا ځوان افغانان بېرته بېوزلۍ او ناهیلۍ ته ستانه کړي، ډېری د هغوی به د دې ډلې تر واک لاندې طالباني شبکو او دیني مدرسو» سره یو ځای شي.
په دې وروستیو کې داسې راپورونه خپاره شول، چې ګڼې اروپايي ټولنې د افغان کډوالو د ایستلو په تړاو د خبرو اترو لپاره طالب پلاوي ته د ورتګ بلنه ورکړې ده.
د اروپايي ټولنې دې پرېکړې د بشري حقونو د بنسټونو اندېښنې راپورته کړې دي. منتقیدینو د اروپايي ټولنې دا کار د دې ډلې د رسمیت پېژندنې په برخه کې یو ګام بللی دی.
