د «د ښځو همت» غورځنګ غړو د زوجینو د جلاوالي په اړه د طالبانو د اصولنامې په غبرګون کې وايي، له ماشوم سره واده د انساني کرامت او ماشوم له حقونو سرغړونه ده.
رخشانه: د دې اعتراضي غورځنګ غړو نن (سه شنبې د غوايي ۲۹ مه) په یوه اعلامیه کې، د طالبانو د مشر له لوري د زوجینو د جلاوالي په اړه د اصولنامې توشېح کېدل په کلکه غندلي دي.
اعلامیه کې راغلی، طالبانو د بشري او ښځو د حقونو پر ضد د سلګونه فرمانونو د صادرولو تر څنګ، دا ځل ماشومان په نښه کړي او هڅه کوي، په حقوقي رسمي جوړښت کې د ماشومتوب واده هم بنسټیز کړي.
د دې غورځنګ غړو د طالبانو دا ګام «له تیاره او منځنیو پېړیو راپورته شوی فکر» بللی وايي، دې ډلې د ماشومانو د ټولو حقونو او خپلواکیو په سرغړونو سره، یوه تته او تیاره راتلونکې د هغوی په برخه کوي.
معترضو ښځو ویلي، طالبان د امنیت خوندي کولو او عدالت د ټینګولو پر ځای، «په له شرمه ډک ښځې ځپوونکي فرمانونو په صادرولو او د انساني حقونو تر پښو لاندې کولو باندې بوخت دي.»
د دې غورځنګ غړو له نړیوالې ټولنې، ملګرو ملتونو، د بشري حقونو او ماشومانو د دفاع حقونو له بنسټونو غوښتي، چې په افغانستان کې په ماشومتوب کې د واده د رسمیت پېژندنې په وړاندې چوپ پاتې نه شي.
د زوجینو د جلاوالي اصولنامه د تېرې اوونۍ د پنشنبې په ورځ د طالبانو د مشر له خوا توشېح شوه. په دې سند کې ماشومانه ودونه د دې ډلې له خوا په رسمیت پېژندل شوي دي.
د طالبانو له لوري د دې قانون توشېح کېدل، د بشري حقونو د بنسټونو او ماشومانو د حقونو د فعالانو د اندېښنې لامل شوی دی.
دا په داسې حال کې ده، چې د طالبانو ډېری غړي له کم عمره نجونو سره په ودونو او د څو ښځو په لرلو تورن دي. د دې ډلې یو شمېر لوړ پوړو چارواکو په تېرو کابو پنځو کلونو کې، له واک څخه په ګټې اخیستې له کم عمره نجونو سره په جبري توګه ودونه کړي دي.
