هلمند کې د طالبانو د اطلاعاتو او کلتور ریاست وايي، د دې ولایت «خانشین» ولسوالۍ کې د یوې پخوانۍ مرمۍ د چاودنې له امله، دوه ماشومانو ژوندی بایللی او یوه ښځه ټپي شوې ده.
رخشانه: دا پېښه نن (چهارشنبې د غوايي ۳۰ مه) له غرمې مخکې د خانشین ولسوالۍ د «سبز قلعه» په سیمه کې رامنځ ته شوې ده.
هلمند کې د طالبانو د اطلاعاتو او کلتور ریاست په خبرپاڼه کې راغلي، ماشومانو یوه پخونۍ مرمۍ موندلې او وروسته یې اور ته اچولې ده.
دې مرمۍ اور ته تر لوېدو وروسته چاودنه کړې، چې له امله یې دوه ماشومان وژل شوي او مور یې ټپي شوې ده.
د دې ماشومانو مور د درملنې په موخه د هلمند مرکز لښکرګاه ښار کې ایمرجنسي روغتون ته لېږدول شوې ده. د هغې روغتیايي وضعیت «ښه» بلل شوی دی.
هلمند کې د طالبانو د اطلاعاتو او کلتور ریاست ویلي، دا دوه ماشومان هلکان و او درې او ۱۰ کاله عمرونه یې درلودل.
د تېرو جګړو پاتې شووني ناچاودني توکي او ماینونه، هر کال د لسګونو هېوادوالو په ځانګړې توګه د ماشومانو ژوند اخلي.
تېره اوونۍ ننګرهار او کونړ ولایتونو کې هم د ناچاودو توکو په چاودنو کې د پنځو ماشومانو، یوې ښځې او یوه نارینه په ګډون اوو تنو ژوند له لاسه ورکړی وو او یو بل ماشوم ټپي شوی وو.
