د اروپايي ټولنې د پارلمان غړې هانا نیومن د افغان کډوالو ایستلو په تړاو د خبرو اترو لپاره، اروپايي ټولنې ته د طالب چارواکو د بلنې په غبرګون کې، ویلي دغه ډله باید اروپا ته دعوت نه شي.
رخشانه: نیومن نن (پنشنبې د غوايي ۳۱ مه) د اروپايي ټولنې پارلمان کې د وینا پر مهال دغه څرګندونې وکړې.
د اروپايي ټولنې دغې غړې په خپله وینا کې، د طالبانو له لوري د افغان ښځو او نجونو ځپنه «ظالمانه او وحشیانه» بللې ده.
هغې ویلي دي: «هېڅ دا ادعا نه شي کولی چې [د ښځو او نجونو په وړاندې د طالبانو په محدودیتونو] نه پوهېږي»، خو له دې سره سره، د اروپايي ټولنې کمېسیون د افغان کډوالو د ایستلو په تړاو د خبرو اترو لپاره طالبانو ته بلنه ورکوي.
نیومن زیاته کړې، د اروپايي ټولنې کمېسیون ادعا کوي، چې د افغان کډوالو د ایستلو په تړاو د خبرو اترو لپاره طالب چارواکو بلنه «له سیاست سره تړاو نه لري او دا مسلکي خبرې اترې دي.»
هغې طالبان «افراطیان» بللي وايي، د دې ډلې د چارواکو پر مخ د دروازې پرانستل، د اروپايي ټولنې د کمېسیون، اروپايي ټولنې د پارلمان او اروپايي ټولنې د شورا د ژمنو پر خلاف کار دی.
مېرمن نیومن ویلي، د اروپايي ټولنې کمېسیون، «بشري حقونو، بې خنډه بشردوستانه لاسرسي، د ترهګرۍ په مرکز بدلېدو لپاره د افغانستان د خاورې کارولو مخینوي او د یوه ټولګډونه حکومت جوړولو ته ژمن دی.»
د اروپايي ټولنې د پارلمان دې غړې زیاته کړې، که طالبان بشري حقونه رعایت نه کړي، بشري مرستو ته د خلکو د لاسرسي خنډ شي، ترهګرو ډلو ته د افغان خاورې د کارولو اجازه ورکړي او ټولګډونه حکومت جوړ نه کړي، نو د اروپا بلنه باید ور نه کړل شي.
هغې له دې وړاندې هم په وار وار اروپايي ټولنې ته، د افغان کډوالو د ایستلو په تړاو د خبرو لپاره د طالب چارواکو د سفر مانع شوې وه.
