د ښځو څو اعتراضي غورځنګونو د طالبانو له لوري د زوجینو جلاوالي اصولنامې او په کې د ماشومتوب واده په رسمیت پېژندلو په غبرګون کې ویلي، دا قانون د ماشومانو له حقونو او نړیوالو اصولو ښکاره سرغړونه ده.
رخشانه: دې اعتراضي غورځنګونو نن (پنشنبې د غوايي ۳۱ مه) په یوه ګډه اعلامیه کې، د طالبانو له لوري د ماشومتوب واده قانوني کول په کلکو ټکو غندلی دی.
معترضو ښځو په اعلامیه کې لیکلي، د ماشومتوب واده، د نجونو په وړاندې یو ډول تاوتریخوالی دی، چې د هغوی د زده کړې، آزادۍ، روغتیا او راتلونکې له منځه وړي.
هغوی د طالبانو له لوري د ماشومتوب واده قانوني کول سخت غندلي او هغه یې د ماشومانو او ښځو له حقونو او د ټولو نړیوالو اصولو او قوانینو څخه ښکاره سرغړونه ګڼلې.
د ښځو د اعتراضي غورځنګونو غړو ویلي، طالبان د «په ښځو ځپوونکو او افراطي سیاستونو سره هڅه کوي، نجونو له خپلو لومړنیو انساني حقونو محرومې کړي.»
معترضو ښځو له ملګرو ملتونو، د بشري حقونو له بنسټونو او نړیوالې ټولنې غوښتي، چې د «طالبانو د دې غیرانساني ګام» په وړاندې چوپ نه شي او د افغان نجونو او ښځو د خوندیتوب لپاره عملي او بېړني ګامونه پورته کړي.
د اعتراضي غورځنګونو غړو د طالبانو د دې اصولنامې په اړه خبرداری ورکړی وايي، د ماشومتوب واده د قانون په وړاندې چوپتیا «له ظلم سره ملګرتیا ده.»
د زوجینو د جلاوالي اصولنامه تېره اوونۍ د طالبانو د مشر له خوا توشېح شوه. په دې سند کې د ماشومتوب واده په قانوني ډول په رسمیت پېژندل شوی دی.
د طالبانو د مشر له خوا د دې قانون توشېح کېدو، د بشري حقونو په ځانګړې توګه د ښځو او ماشومانو د حقونو د فعالانو غبرګونونه راپارولي دي.
د بشري حقونو فعالان او معترضې ښځې د طالبانو له لوري د دې قانون توشېح کول، د بشري حقونو ښکاره سرغړونه او د ښځو او ماشومانو په وړاندې د منظم تاوتریخوالي یو ډول بولي.
