بامیانو کې سیمه ییزې سرچینې وايي، د طالبانو استخباراتي ځواکونو په دغه ولایت کې، د «راډیو بامیان» مخینې لرونکې غږیزې رسنۍ دفتر مهر لاک او وتاړه.
رخشانه: بامیانو کې لږ تر لږه دریو سرچینو د هویت پټ ساتلو سره رخشانې رسنۍ ته ویلي، د دې راډیو دفتر یکشنبې د (غوايي ۲۷ مه) د طالب استخباراتو له خوا مهر لاک شوی دی.
د سرچینې په وینا، طالب استخباراتي ځواکونو د دې ولایت د مرکز «شهر نو» سیمه کې د بامیان راډیو په دفتر یرغل کړی او دا رسنۍ یې له کوم دلیل او توضیح پرته تړلی دی.
سرچینې زیاته کړې، په دې ولایت کې د طالبانو محلي ادارې له تېرو څو کلونو راهیسې د بامیان راډیو د فعالیت جواز نه دی تمدید کړی.
په ورته وخت بامیانو کې د طالبانو د والي ویاند صبور سیغاني سیمه ییزه رسنیو ته ویلي، د بامیان راډیو دفتر د جواز نه نوي کولو له امله مهر لاک شوی دی.
هغه په دې اړه ډېر جزیات نه دي ورکړي. معلومه نه ده، چې د طالبانو ځايي اداره به دې غږیزې رسنۍ ته د بیا فعالیت اجازه ورکړي که نه.
بامیان سیمه ییزه راډیو په دې ولایت کې لومړنۍ خصوصي رسنۍ ده، چې په ۱۳۸۲ لمریز کال یې د ۸۹.۷ اېف اېم څپو باندې خپرونې پیل کړې.
دې غږیزه رسنۍ په خپل تېر۲۳کلن فعالیت کې، کلتوري، هنري، اقتصادي او سیاسي خپرونې د بامیانو خلکو ته وړاندې کولې.
طالبانو په تېرو کابو پنځو کلونو کې د رسنیو او خبریالانو پر فعالیت سخت محدودیتونه لګولي دی. دې ډلې په یاده موده کې لسګونه خبریالان نیولي، څو تنه یې زنداني کړي او د لسګونو رسنیو فعالیت یې درولی دی.
