ملالې بنسټ (Malala Fund) د «زوجینو جلاوالي اصولنامې» توشېح ته په غبرګون کې وايي، دا قانون د «حقونو له یوې ساده سرغړونې» ورپورته دی او د افغان ښځو او نجونو د ژوند په ټولو اړخونو «بنسټیزه سلطه» رامنځ ته کوي.
رخشانه: دې بنسټ تازه پر خپله اېکس پاڼه د یوه پوسټ په خپرولو سره، د طالبانو د مشر له خوا د ښځې او مېړه جلاوالي قانون توشېح ته غبرګون ښودلی دی.
ملالې بنسټ لیکلي، طالبانو په دې قانون کې «د نجلۍ چوپتیا د واده لپاره په رضایت» تعبیر کړې ده.
دې بنسټ زیاته کړې، طالبانو ګام په ګا داسې یو نظام جوړ کړیو چې د ښځو او نجونو د ژوند په ټولو اړخونو سلطه لري.
ملالې بنسټ ټینګار کړی «کله چې حذف او محرومیت په قانون کې ولیکل شي، دا نو نور یوازې د حقونو نقض نه، بلکې په یوې بنسټیزې سلطې بدلېږي.»
دې بنسټ، د افغان ښځو او نجونو په وړاندې د طالبانو پراخو محدودیتونو ته په اشارې ویلي، ښځې د حساب ورکولو، عدالت او جنسیتي توپیر د پای ته رسولو غوښتنې په لومړۍ کرښه کې دي.
د زوجینو د جلاوالي اصولنامه تېره اوونۍ د طالبانو د مشر له خوا توشېح شوې ده. په دې قانون کې د ماشومتوب واده په قانوني توګه په رسمیت پېژندل شوی دی.
د طالبانو د مشر له خوا د دې قانون توشېح کېدو، د بشري حقونو، په ځانګړې توګه د ښځو او ماشومانو د حقونو بنسټونو غبرګون راپارولی دی.
د بشري حقونو فعالانو او معترضو ښځو، د طالبانو له لوري د دې قانون توشېح کېدل، له بشري حقونو ښکاره سرغړونه او د ښځو او ماشومانو په وړاندې ښکار تاوتریخوالی بللی دی.
یوناما هم دوه ورځې وړاندې په یوه اعلامیه کې د دې قانون د توشېح په اړه اندېښنه څرګنده کړې وه او لیکلي یې وو، دا قانون د ښځو او نجونو د حقونو تر پښو لاندې کولو لامل کېږي.
دې بنسټ د «زوجینو د جلاوالي اصولنامه» «نابرابره» بللې لیکلي یې دي، د دې قانون له مخې، نارینه د طلاق برخه کې له یو اړخیز حق نه برخمن دي او ښځې باید له مېړه د جلاوالي لپاره، پېچلې او محدودونکې قضايي لارې تعقیب کړي.
