کابل کې د طالبانو د امنیه قوماندانۍ ویاند خالد ځدراڼ رسنیو ته تایید کړې، چې د کابل شهزاد سرای ته نېږدې په ډزو کې د یوې ښځې په ګډون څلور تنه وژل شوي دي.
رخشانه: ځدراڼ ویلي، دا نښته نن (یکشنبې د غبرګولي ۳ مه) د کابل ښار شهزاد سرای ته نېږدې د «زرګرۍ په یوه بازار» کې رامنځ ته شوې ده.
هغه زیاته کړې، د دې پېښې د قربانیانو په منځ کې د ولسي جرګې د پخواني غړي الله ګل مجاهد زوی احسان الله مجاهد، د هغه یو ساتونکی، یو سړی او یوه ښځه شامل دي.
کابل کې د طالبانو د امینه قوماندانۍ ویاند د وژل شوې ښځې د هویت په اړه څه نه دي ویلي.
ځدراڼ وايي، دا نښته د «شخصي دښمنۍ» له امله رامنځ ته شوې ده.
هغه ادعا کړې، چې یو «برید کوونکی ټپي» او د الله ګل مجاهد د کورنۍ یو غړی د دې پېښې په تړاو نیول شوی دی.
نن له ماسپښین وروسته یو شمېر رسنیو د کابل ښار شهزاد سرای ته نېږدې د وسله والې نښتې خبر ورکړی وو.
