د «ښځو حرکت شبکې» او «د آزادۍ لپاره د افغان ښځو یووالي غورځنګ» د طالبانو د زوجینو جلاوالي اصولنامې ته غبرګون کې وايي، دا یو شرموونکی سند او د افغان نجونو غلام کولو ته د مشروغیت ورکول دي.
رخشانه: دې دوه غورځنګونو نن (یکشنبې د غبرګولي ۳ مه) په یوه اعلامیه کې لیکلي، د دې قانون توشېح کول ښيي، چې د طالبانو حکومت، پر ځپنې، ښځو ځپلو او د ماشومانو د حقونو له منځه وړلو پر بنسټ جوړ شوی دی.
د دې دوه غورځنګونو په اعلامیه کې راغلي، دا طالبان دا مهال د «شریعت» تر نامه لاندې په رسمي توګه د ماشومانو پلورنې د قانوني کولو په لټه کې دي.
معترضو ښځو ویلي، دغه ډله غواړي افغان نجونوې له درسي ټولګیو د واده جبري ګوټو او د ماشوم توب له خوبونو غلې هدیرې او تاوتریخوالي ته ټېل وهي.
هغوی د ماشومتوب واده د ماشومانو، انسانیت او د افغانستان د راتلونکې په وړاندې جنایت وباله وايي، طالبانو د زوجینو جلاوالي اصولنامې په توشېح سره «د نجونو بدن او ژوند د خپلې ایډیولوژیکې معاملې په توکو بدل کړي دي.»
د دې دوه اعتراضي غورځنګونو غړو ویلي، طالبانو د دې سند په توشېح سره، افغان نجونې د قانوني تېري او عصري غلامۍ قرباني کوي.
دوی ټینګار کړی، د طالبانو دا ګام د ماشومانو په وړاندې د هدفي جنایتونو سره توپیر نه لري او نړۍ نه باید هغه د کلتور، مذهب یا دود په توګه توجیه کړي.
معترضو ښځو له ملګرو ملتونو، د بشري حقونو له بنسټونو او ټولو دولتونو غوښتي، چې طالبان د جنسیتي توپیر او د ماشومانو په وړاندې د جنایت د عامل په توګه محکوم کړي.
همدارنګه دوی دا غوښتنه هم کړې چې طالبان باید په نړیواله کچه د «دې غیرانساني سیاستونو د عاملینو» په توګه محاکمه شي.
د زوجینو جلاوالي اصولنامه تېره اوونۍ د طالبانو د مشر له خوا توشېح شوه. په دې سند کې د ماشومتوب واده په قانوني توګه په رسمیت پېژندل شوی دی.
د طالبانو د مشر له لوري د دې قانون توشېح کېدو د بشري حقونو په ځانګړې توګه د ښځو او ماشومانو د حقونو د فعالانو غبرګونونه راپارولي دي. فعالانو دا قانون د بشري له حقونو ښکاره سرغړاوی او د ښځو او ماشومانو په وړاندې سیستماتیک تاوتریخوالی وباله.
