کندهار کې د طالبانو د اطلاعاتو او کلتور ریاست په یوه اعلامیه کې خبر ورکړی، چې په دغه ولایت کې یې د «تحسین القران، څانګې او زما زېور» راډیوګانو دفترونه وتړل او د هغوی خپرونې یې بندې کړې.
رخشانه: د دې دریو سیمه ییزه راډیوګانو خپرونې نن (یکشنبې د غبرګولي ۳ مه) کندهار کې د طالبانو د اطلاعاتو او کلتور ریاست له خوا بندې شوې دي.
کندهار کې د طالبانو د اطلاعاتو او کلتور ریاست په خبرپاڼه کې راغلي، د دې راډیوګانو دفترونه «د رسمي جواز نه لرلو، د مالیاتو د اداینې او غیرمعیاري» له امله تړل شوي او خپرونې یې بندې شوې دي.
د طالبانو د اطلاعاتو او کلتور ریاست «ملت ږغ» او «واړنګې» سیمه ییزه راډیوګانو ته هم ویلي، چې ژر تر ژره د خپلو اسنادو لېږد بشپړ کړي او خپل فعالیتونه قانوني کړي.
دې ریاست کندهار کې ټولو محلي راډیوګانو ته هم خبرداری ورکړی، چې «خپل نشرات د اسلامي اصولو او اخلاقو سره سم تنظیم کړي.»
د افغان خبریالانو مرکز (AFJC) د طالبانو له لوري کندهار کې د درې محلي راډیوګانو تړل کېدو ته په غبرګون کې ویلي، کندهار کې د طالبانو د استخباراتو ریاست، د محلي راډیوګانو د جوازنو د تمدید مخنیوی کړی دی.
دې بنسټ نن ماښام «یکشنبې د غبرګولي ۳ مه) په یوه اعلامیه کې د طالبانو دا ګام هېواد کې د رسنیو د آزادۍ د ځپلو یوه بله ښکاره سرغړونه بللې او هغه یې په کلکو ټکو غندلې ده.
کندهار کې د طالبانو د اطلاعاتو او کلتور ریاست نن اعلام کړی، چې په دغه ولایت کې یې د «تحسین القران، څانګې او زما زېور» راډیوګانو دفترونه وتړل او د هغوی خپرونې یې بندې کړې.
دا راډیوګانې پر داسې مهال تړل کېږي، چې د تېرې اوونۍ د یکشنبې په ورځ، بامیانو کې د طالبانو استخباراتي ځواکونو د «شهرنو» په سیمه کې د بامیان راډیو په دفتر یرغل وروړ او دا رسنۍ یې وتړله.
بامیانو کې د طالبانو د محلي ادارې ویاند ادعا کړې وه، چې د دې غږیزې رسنۍ دفتر یې د جواز نه نوي کولو له امله مهرولاک شوی دی.
د افغان خبریالانو مرکز د دې رسنۍ د فعالیت درېدو وروسته لیکلي چې د بامیان راډیو استازي څو ځلې د دې رسنۍ د جواز د نوي کولو غوښتنه وړاندې کړې وه، خو د طالبانو له لوري د هغه غوښتنه رد شوې ده.
یاد مرکز زیاته کړې، یوازې په ۱۴۰۴ لمریز کال کې د لږ تر لږه ۲۱ محلي تلوېزیونونو فعالیت، د ساه کښو د انځور خپرولو له امله درول شوی دی.
طالبانو په تېر یوه کال کې، اته رسنۍ او رسنیز بنسټونه د رسنیو د پالیسیو نه رعایت کولو له امله، د فعالیت درولو ته اړ کړي او لږ تر لږه د ۱۰ خبري بنسټونو او رسنیو جوازونه یې لغوه کړي دي.
دې ډلې په تېرو څه کم پنځو کلونو کې پر رسنیو د محدودیتونو سربېره، څو تنه خبریالان، کارکوونکي او رسنیز فعالان نیولي او څو تنه یې زنداني کړي دي.
