لغمان کې سیمه ییز طالب چارواکي وايي، د دې ولایت قرغه يي ولسوالۍ کې د یوې ترافیکي پېښې له امله، د لسو ماشومانو، پنځو ښځو او درې نارینه وو په ګډون ۱۸ تنو ژوند له لاسه ورکړ او ۲۹ نور ټپیان شوي دي.
رخشانه: لغمان کې د طالبانو د والي ویاند عبدالمالک نیازي، سیمه ییزه رسنیو ته ویلي، دا پېښه نن (شنبې د غبرګولي ۹ مه) د سهار ۵:۳۰ بجې د کابل- جلال آباد پر لویه لار «سرخکان چوک» کې رامنځ ته شوې ده.
د نیازي په وینا، دا پېښه له پاکستان نه د راستېدونکو کډوالو د یوه باروړونکي موټر د چپه کېدو له امله، رامنځ ته شوې ده.
ده زیاته کړې، په دې ترافیکي پېښه کې د لسو ماشومانو، پنځو ښځو او درې سړیو په ګډون ۱۸ تنه مړه شوي او ۲۹ نور ټپیان دي.
په ټپیانو کې هم ښځې او ماشومان شته.
د پېښې ټپیان د درملنې په موخه د ننګرهار حوزوي روغتون ته لېږدول شوي دي، چې د ځینو روغتیايي وضعیت نازک ښودل شوی دی.
ترافیکي پېښې تر ډېره د لارو د خرابوالي او نه معیاري توب، له قانوني بریده ګرندي تګ، د ترافیکي قوانینونو نه مراعت کولو او د موټرونو د ورستوالي له امله رامنځ ته کېږي.
په هېواد کې هر کال د ترافیکي پېښو په ترڅ کې د ښځو او ماشومانو په ګډون لسګونه کسان قرباني کېږي.
