په «جلا وطنۍ کې د افغان ښځو غورځنګ» ویلي، د ماشومتوب واده له بشري حقونو ښکاره سرغړونه ده او ماشومان، د زده کړې، سالمې ودې، بدني او رواني روغتیا او خپلواکه راتلونکې له حق څخه محروموي.
رخشانه: د دې اعتراضي غورځنګ غړو، د ماشوم د نړیوالې ورځې په درشل کې په یوه اعتراضي بیانیه کې ویلي، افغانستان کې میلیونونه ماشومان، په ځانګړې توګه نجونې، له جدي محدودیتونو او ګواښونو سره مخ دي.
په دې بیانیه کې راغلي «د طالبانو سیاستونه او محدودیتونه، د ماشومانو د حقونو، په ځانګړې توګه د ماشومتوب واده د دودولو او مشروعیت ورکولو سرغړونې ته لار هواروي.»
معترضو ښځو د افغان ښځو او نجونو په وړاندې د طالبانو د پراخو محدودیتونو له دوامه اندېښنه ښودلې ده.
هغوی د ماشومتوب واده د بشري او ماشومانو د حقونو څخه ښکاره سرغړونه بللې وايي، هغه ماشومان چې د ماشومتوب واده قرباني کېږي، د زده کړې، سالمې ودې، بدني او رواني روغتیا او خپلواکې راتلونکې څخه بې برخې کېږي.
د جلا وطنه افغان ښځو غورځنګ پر دوام ویلي، هېڅ دود، عرف یا سیاسي تفسیر نه باید د ماشومانو د اساسي حقونو د سلب پلمه شي.
معترضو ښځو ټینګار کړي، چې نجونې حق لري خپله د ماشومتوب دوره په خوندیتوب، زده کړې او انساني کرامت کې تېره کړي او له جبري او له وخته مخکې واده څخه خوندي وي.
دوی له ملګرو ملتونو، د بشري حقونو له بنسټونو، دولتونو او د ماشومانو د حقونو له مدافعینو غوښتي، چې د افغان ماشومانو، په ځانګړې توګه د نجونو د ملاتړ لپاره ګټور او عملي ګامونو اخیستو ته لومړیتوب ورکړي.
طالبانو د زوجینو جلاوالي قانون په توشېح سره د ماشومتوب واده په رسمي توګه په رسمیت پېژندلی دی. په دې سند کې د ماشومې نجلۍ چوپتیا د واده لپاره د هغې د رضایت په مانا تفسیر شوې ده.
د دې سند توشېح کېدو د بشري په ځانګړې توګه د ماشومانو د حقونو د بنسټونو اندېښنې راپارولې دي. فعلانو دا سند د بشري او ماشومانو له حقونو ښکاره سرغړونه بللې او د طالبانو له خوا یې د هغې د لغوه کولو غوښتنه کړې ده.
خو طالبانو د بشري او ماشومانو د حقونو د بنسټونو دې غوښتنې ته په ځواب کې د دې، قانون توشېح کېدل د افغانستان کورنۍ مساله بللې وايي، دا د بشري حقونو په بنسټونو پورې اړه نه لري.
