یو شمېر المان مېشتو افغانانو، د افغان ښځو او نجونو په ملاتړ د دې هېواد پلازمېنه برلین ښار کې اعتراضي لاریون وکړ.
رخشانه: دا اعتراضي غونډه پرون (شنبې د می ۳۰ مه) د المان په محلي وخت او د بشري حقونو د فعالانو او معترضو ښځو په شتون کې، په برلین ښار کې تر سره شوه.
ګډونوالو دا اعتراضي غونډه تر نړیوالو پورې، د طالبانو تر واک لاندې د افغان ښځو او نجونو د غږ رسولو په موخه تر سره کړه.
دوی په دې غونډه کې د «ډوډۍ، کار او خپلواکۍ»، «طالبانو ته نه» او «جنستي توپیر ته نه» شعارونو په ورکولو سره، د افغان ښځو او وګړو سره خپل پیوستون څرګند کړ.
د دې اعتراضي غونډې ګډونوالو، د طالبانو تر واک لاندې افغانستان کې د افغان ښځو او نجونو وضعیت او د هغوی د اساسي او مدني حقونو خوندیتوب ته د رسیدګۍ غوښتنه وکړه.
دوی له نړیوالې ټولنې وغوښتل، چې د افغان ښځو او نجونو د وضعیت په اړه چوپتیا غوره نه کړي او د ښځو او نجونو له اساسي حقونو دفاع وکړي.
طالبانو په تېرو نېږدې پنځو کلونو کې د ښځو او نجونو په وړاندې د لسګونو فرمانونو په صادرولو سره، هغوی له خپلو تر ټولو لومړنیو حقونو محرومې کړې دي.
د طالبانو مشر کابو دوه اوونۍ وړاندې د زوجینو جلاوالي قانون توشېح کړ. هغه سند چې د بشري حقونو د څارونکو او فعالانو په اند، پر افغان ښځو او نجونو یو نوی محدودیت شمېرل کېږي.
په دې سند کې د طالبانو مشر د کم عمره ماشومانو واده په رسمیت پېژندلی او د نجلۍ چوپتیا یې واده ته د چمتوالي او تایید په مانا تعبیر کړی دی.
د بشري حقونو فعالانو دا سند د بشري او ماشومانو د حقونو ښکاره سرغړونه بللې او د دې قانون او د افغان ښځو او نجونو پر حقونو او اساسي خپلواکیو یې د طالبانو د نورو محدودیتونو د لغوه کولو غوښتنه کړې ده.
