افغانستان کې د روغتیا نړیوال سازمان (WHO) اټکل کړې، چې ۲۰۲۶ میلادي کال کې به افغانستان کې، له پنځو کلونو کم عمره شاوخوا ۳.۷ میلیونه ماشومان په سخته خوراځواکۍ اخته شي.
رخشانه: دې بنسټ نن (سه شنبې د غبرګولي ۱۲ مه) په خپله اېکس پاڼه لیکلي، د دې شاوخوا ۳.۷ میلیونه ماشومانو له منځه به کابو ۹۵ زره تنه له روغتیايي پېچلتیاوو سره مل سختې خوارځواکۍ سره مخ شي.
د روغتیا نړیوال سازمان اعلامیه وايي، له روغتیايي پېچلتیاوو سره مل په سختې خوارځواکۍ اخته ماشومان به د نه درملنې په صورت کې ښايي د مرګ له خطر سره مخ شي.
دې بنسټ زیاته کړې، له اقتصادي ستونزو، خوړو د نه خوندیتوب، د پرلپسې ناروغیو د خورېدو، اقلیمي بدلونونو او روغتیايي او خوړو خدماتو ته د محدود لاسرسي، له امله رامنځ ته شوې خوراځواکي د ټولو افغان ماشومانو ژوند ګواښي.
د روغتیا نړیوال سازمان ویلي، دوی د افغانستان د بشري مرستو صندوق (AHF) په مالي ملاتړ، په ټول هېواد کې زیان منونکو ټولنو ته د ژوند ژغورونکې تغذیې خدماتو چمتو کولو ملاتړ کوي.
د دې سازمان په وینا، د دې سازمان تر ملاتړلاندې مرکزونه، چې لږ بیارغول شوي، په اړینو تغذي تجهیزاتو، درملو او روزل شویو روغتیايي کارکونکو سمبال شويو تر څو د سختې خوارځواکۍ سره مخ ماشومانو ته بېړني خدمات وړاندې کړي.
افغانستان کې د روغتیا نړیوال سازمان استازي ډاکتر ادوین سنیزا سالوادرو ویلي: «په وخت سره د تغدیې مداخلې کولی شي د ماشومانو ژوند وژغوري.»
هغه په ټول افغانستان کې ماشومانو او کورنیو ته د اړینو تغذیوي خدماتو وړاندې کولو لپاره د دوامداره بشري ملاتړ پر اړتیا ټینګار وکړ.
د روغتیا نړیوال سازمان د افغانستان د بشري مرستو صندوق او نورو روغتیايي او تغذيي شریکان، چې په ټول افغانستان کې د ماشومانو او زیان منونکو ټولنو لپاره د ژوند ژغورونکې تغذیې د خدماتو ملاتړ کوي ستاینه کړې ده.
د طالبانو په بیا واک ته رسېدو سره، په هېواد کې بشري وضعیت ورځ تر بلې خراب شوی دی. د بشردوستانه خدماتو وړاندې کوونکو نړیوالو فعالو بنسټونو تل په افغانستان کې له بشري بحران څخه خبرداری ورکړی دی.
