پروان کې ځايي طالب چارواکي وايي، د دې ولایت شینوارو ولسوالۍ کې د یوې ترافیکي پېښې له امله، د څلورو ماشومانو په ګډون اتو تنو ژوند له لاسه ورکړی او ۱۶ نور ټپیان دي.
رخشانه: پروان کې د طالبانو د امنیه قوماندانۍ ویاند فضل الرحیم مسکینیار ویلي، دا پېښه نن (سه شنبې د غبرګولي ۱۲ مه) شاوخوا ۹ بجې د شینوارو ولسوالۍ د «دره استامه» په سیمه کې رامنځ ته شوې ده.
هغه زیاته کړې، دا ترافیکي پېښه له سړک څخه د یوه «فلانکوچ» ډول مسافروړونکي موټر د اوښتو له امله رامنځ ته شوې ده.
د نوموړي په وینا، په دې پېښه کې د څلورو ماشومانو په ګډون اتو تنو ژوند له لاسه ورکړی او ۱۶ نور ټپیان دي.
د پېښې ټپیان د درملنې په موخه د پروان ملکي روغتون ته لېږدول شوي دي.
پروان کې د طالبانو د امنیه قوماندانۍ ویاند د دې پېښې د ټپیانو، د عمر، جنسیت او روغتیايي وضعیت په اړه څه نه دي ویلي.
دا موټر د شینوارو ولسوالۍ له «دره استامه» سیمې د پروان مرکز چاریکارو ښار په لور روان وو، چې لومړی له سړک نه ووت او وروسته چپه شو.
د سړکونو خرابوالی او د موټر چلوونکو بې احتیاطي، د دې ډول خونړیو پېښو د رامنځ ته کېدو اصلي لامل ګڼل کېږي.
هر کال په ټول هېواد کې د ښځو او ماشومانو په ګډون لسګونه تنه په ترافیکي پېښو کې قرباني کېږي.
دغه ډول ډېری پېښې د سړکونو د خرابوالي، د ترافیکي قوانینو نه پلي کولو او موټرو د زړښت له امله رامنځ ته کېږي.
