د افغانستان د فوټبال ښځینه لوبډلې، د فیفا له لوري په نړیوالو لوبو کې د جواز تر لاسه کولو وروسته، په خپله لومړۍ لوبه کې د کوک ټپاګانو له ښځینه لوبډلې ماته ومنله.
رخشانه: دغه دوستانه لوبه نن سهار (پنشنبې د غبرګولي ۱۴ مه) د نیوزلنډ اوکلنډ ښار کې تر سره شوه.
د افغانستان ښځینه فوټبال لوبډلې په لومړۍ نیمايي کې له سیالې لوبډلې یو ګول په تر لاسه کولو شا ته پاتې شوه.
دې لوبډلې په دویمه نیمايي کې ونه شوای کولی ورکړل شوی ګول جبران کړي او دا لوبه یې یو د صفر په مقابل کې د کوک ټاپوګانو ښځینه لوبډلې ته پرېښوده.
ټاکل شوې د دې دوستانه لوبلړۍ دویمه سیالي د روان میلادي کال د جون په ۸ مه اوکلنډ ښار کې تر سره شي.
دا به وکتل شي، چې د اسکاټلنډي روزونکي پائولین همیل شاګردانې به راتلونکې لوبه کې ورکړل شوی ګول جبران کړي که نه.
د افغانستان د فوټبال ښځینه لوبډلې مشر روزونکی ویلي، دا لوبې د لوبغاړو سره مرسته کوي، چې له فشار او چاپېریال سره ښه بلد شي، په نړیواله کچه د لوبو وړتیا پیدا کړي او خپله وړتیا لا نوره پیاوړې کړي.
د دې لوبډلې اسکاټلنډی روزونکي زیاته کړې، د وړتیا تر لاسه کولو کمپونه په بېلا بېلو هېوادونو کې تر سره کوي، تر څو لوبغاړي د راتلونکو لوبو لپاره لا ښه سره راټول شي.
د «افغان محتده ښځو» فوټبال لوبډله، چې د افغانستان د فوټبال ښځینه لوبغاړو څخه جوړه شوې ده. د ۲۰۲۵ کال په می میاشت کې جوړه شوې ده. دې لوبډلې د ۲۰۲۵ میلادي کال په اکتوبر او نوامبر کې د لومړي ځل لپاره د مراکش ښار په «FIFA Unites: Women’s Series» په سیالیو کې ګډون وکړ.
فیفا څه موده وړاندې اعلان وکړو چې په جلاوطنۍ کې د افغانستان د فوټبال ښځینه لوبډله کولی شي، د طالبانو له تایید پرته په رسمي لوبو کې د افغانستان استازیتوب وکړي.
د افغانستان د فوټبال ښځینه ملي لوبډلې غړې، د ۲۰۲۱ په اګست کې د طالبانو له بیا واک ته رسېدو وروسته، استرالیا، امریکا او اورپايي هېوادونو ته کډه شوې.
طالبانو د ښځو او نجونو په وړاندې د نورو محدودیتونو سربېره، هغوی له لوبو هم منع کړې دي. د دې بندیز په ترڅ کې د هېواد ټولې ښځینه ملي لوبډلې منحل شوې دي.
