افغان توکمه ځوانه ښځه سمیرا نوا د ډنمارک په دولت کې د اوبو، انرژۍ او عمومي خدماتو د وزیرې په توګه ټاکل شوې ده.
رخشانه: د ډنمارک لومړي وزیر مته فردریکسن پرون چهارشنبې د (غبرګولي ۱۳ مه) اعلان وکړ، چې د خپلې کابینې د نویو غړو نوملړ یې معلوم کړی دی.
هغه ویلي، د کابینې د غړو په نوي نوملړ کې یې افغان توکمه ښځه سمیرا نوا د اوبو، انرژۍ او عمومي خدماتو د وزیرې په توګه نومولې ده.
سمیرا نوا هم په خپله فسبوک پاڼه د یوې پوسټ په خپرولو سره لیکلي چې «اوس د ډنمارک تاریخ تر ټولو زرغون دولت په واقعیت بدل شوی دی. له اوونیو خبرو اترو وروسته، په رښتیا خوشحاله او فکر مې آرام دی.»
مېرمن نوا زیاته کړې: «کولی شم هغه ټول څه چې ډنمارک یې په یوه لوی هېواد بدل کړی دی، پیاوړی کړم، په ځانګړې توګه راتلونکو نسلونو ته.»
هغې د المات د دولت د پروګرامونو په اړه د سوسیال دموکرات، خلق سوسیالیست (SF) او منځلارو ګوندونو له رغنده خبرو مننه کړې ده.
نوا په پای کې لیکلي: «اوس دې ته لېواله یمو چې د دنمارک بشپړ مسوولیت په غاړه واخلم او د هېواد تر ټولو زرغون دولت لپاره مټې رابډوهم، دا به څومره لوی ویاړ وي، چې په دې ډول د ډنمارک په خدمت کې وم.»
سمیرا نوا په کال ۱۹۸۸ کې په ډنمارک کې زېږېدلې ده. د هغې مور او پلار په کال ۱۹۸۶ کې له افغانستان نه ډنمارک ته کډه شوي وو.
هغه د کپنهاګن په اقتصاد پوهنتون کې زده کړې کړې او له دې وړاندې یې د ډنمارک په فکري ټولنو او بېلا بېلو بنسټونو کې فعالیت کړی دی.
دا ځوانه افغان توکمه ښخه، په داسې حال کې د ډنمارک د کابینې غړې کېږي، چې په افغانستان کې ښځې له خپلو تر ټولو لومړنیو حقونو بې برخې دي. طالبانو د ښځو او نجونو په وړاندې د لسګونو فرمانونو په صادرولو سره، هغوی د هېواد له ټولنیزې فضا حذفې کړې دي.
