افغانستان کې د ملګرو ملتونو د سیاسي استازولۍ دفتر (یوناما) ویلي، دې هېواد کې ښځې او ماشومانو له نورو ډېر د اوبو له بحران نه زیانمنېږي.
رخشانه: یوناما نن (پنشنبې د غبرګولي ۱۴ مه) په خپله فسبوک پاڼه د یوه راپور په خپرولو سره لیکلي، د خلکو تر منځ د اوبو برابرولو مسوولیت په برابره توګه نه دی وېشل شوی.
یوناما ویلي، د اوبو نړیوال راپور، چې د ملګرو ملتونو له خوا د ۲۰۲۶ کال لپاره چمتو شوی، ښځې او نجونې د نورو په پرتله ډېر د اوبو راوړولو ستونزې ګالي.
د یوناما په وینا، د اوبو پراخېدونکي بحران، د افغانستان د خلکو پر ژوغند ژورې اغېزې کړې او ښځې او ماشومان له نورو ډېر د دې بحران زیان ویني.
د ملګرو ملتونو د راپور له مخې، د اوبو بحران [د طالبانو تر واک لاندې افغانستان کې] شته جنسیتي نابرابرۍ لا شدیدې کړې دي.
راپور کې زیاته شوې، د روغتیايي او حفظالصحه امکاناتو د کمښت له امله، ټولنې په ځانګړې توګه ماشومان، له اوبو د خورېدونکو ناروغیو له ګواښ سره مخ کېږي.
د سره صلیب نړیوالې کمېتې (ICRC) د روان لمریز کال په پیل کې اعلان وکړ، چې افغانستان کې د اوبو بحران مخ په زیاتېدو دی او ښځې او ماشومان د دې بحران ډېر بار په اوږو وړي.
د دې بنسټ په وینا، افغانستان کې ډېری کورنۍ لا هم اړ دي، چې د اوبو تر لاسه کولو لپاره په ساعتونو پلی تګ وکړي. په دې منځ کې ښځې او ماشومان د اوبو برابرو ډېر بار وړي.
