د بشري حقونو فعاله او «جنسیتي توپیر ته پای ورکړی» کمپاین غړې میترا مهران وايي، افغانستان کې د جنسیتي توپير موضوع په رسمي توګه، د بشریت ضد جرمونو په اړه د ملګرو ملتونو کنوانسیون د مذاکراتو اجندا کې ځای شوه.
رخشانه: مېرمن مهران نن (جمعه د غبرګولي ۱۵ مه) رخشانې رسنۍ ته و ویل، افغانستان کې «جنسیتي توپیر» په رسمي توکه د بشریت په وړاندې جرمنونو په اړه د ملګرو ملتونو په کاري اجنډا کې داخل شو.
همدارنګه مېرمن مهران په خپله اېکس پاڼه لیکلي «زموږ شریکانو په نه ستړې کېدونکې توګه د بېلا بېلو هېوادونو سره د «بشریت په وړاندې جرمونو» تړون کې د «جنسیتي توپير» د ځای پر ځای کولو لپاره عدالت غوښتنه وکړه.»
هغې زیاته کړې، د افغانستان په ګډون اوو هېوادونو، استرالیا، ایسلنډ، مکزیک، اسپانیا، شرقي تمیور او اروګونه، په رسمي ډول د ملګرو ملتونو له سرمنشي وغوښتل، چې «جنسیتي توپیر» د «بشريت په وړاندې جرمونو» تړون کې ځای کړي.
د ښځو حقونو د دې فعالې په وینا، دا غوښتنه په دې مانا ده، چې «جنسیتي توپیر» په رسمي ډول د دې تړون اړوند خبرو اترو اجنډا ته داخل شوی دی.
مهران زیاته کړې، د روان کال د اپرېل ۳۰ مه د ملګرو ملتونو غړو هېوادونو ته وروستی ابتدايي مهلت وو، تر څو خپل لیکلي وړاندیزونه، د ملګرو ملتونو د بشریت په وړاندې جرمونو کنوانسیون ته وړاندې کړي.
د هغې په وینا، دا وړاندیزونه د ملګرو ملتونو د عمومي اسامبلې په شپږمه کمېټه کې د یادو شویو وړاندیزو تر څنګ، د دغه تړون د راتلونکو خبرو اترو بنسټ جوړوي.
طالبانو د ۲۰۲۱ په اګست کې له بیا واکمنېدو وروسته، هېواد کې د ښځو او نجونو به بنسټیزه خپلواکیو او حقونو سخت محدودیتونه لګولي دي.
د بشري حقونو فعالانو، معترضو ښخو او د بشري حقونو بنسټونو په وار وار، د ښخو او نجونو په وړاندې د طالبانو محدودیتونه د جنسیتي توپیر بېلګه بللې او د نړیوالې ټولنې له خوا یې د جرم په توګه د هغې د په رسمیت پېژندلو غوښتنه کړې ده.
