افغانستان کې د ملګرو ملتونو سازمان، د دې سازمان د بشري مرستو د همغږۍ دفتر (UNFPA) د یوې کارکوونکې فرشته عمادي د مړینې پخلی کړی دی.
رخشانه: ملګرو ملتونو نن (جمعه د غبرګولي ۱۵ مه) په خپله اېکس پاڼه د یوه پوسټ په خپرولو سره د مېرمن عمادي د مرګ پخلی کړی او له کورنۍ سره یې خواخوږي ښودلې ده.
د ملګرو ملتونو سازمان په اعلامیه کې راغلي «د هغې کمی به سخت احساس شي، موږ د هغې کورنۍ، دوستانو او خپلونو ته د تسلیت مراتب وړاندې کوو.»
ملګرو ملتونو «په دې سخت وخت کې د فرشتې عمادي د بازماندګانو د خصوصي حریم د درناوي» غوښتنه کړې ده.
دې بنسټ معلومه کړې نه ده، چې دا مېرمن څه وخت، چېرته او څرنګه مړه شوې ده.
یو شمېر رسنیو پرون شپه د مېرمن عمادي د وژل کېدو خبر خپور کړی وو.
دا هم نه ده معلومه، چې فرشته عمادي په خپل مرګ مړه شوې او که وژل شوې ده.
د فرشتې عمادي یو تن خپلوان په خپله فسبوک پاڼه د هغې د مړینې پخلي کړی او لیکلي یې دي «د انجنیر ویس عمادي مېرمن وفات شوې ده.»
دې شخص د فرشتې عمادي د وژل کېدو په تړاو ځانګړي څه نه دي لیکلي. طالبانو هم تر اوسه په دې اړه څه نه دي ویلي.
طالبانو ملګرو ملتونو پورې تړلو دفترونو کې د ښځو پر کار بندیز لګولی دی. د طالبانو د امر له مخې، د ملګرو ملتونو ښځینه کارکوونکې څو میاشتې کېږي، چې په خپلو دفترو کې د شتون له حق څخه محرومې دي.
ملګرو ملتونو تېر کال اعلان کړی وو، چې کابل کې یې یو شمېر ښځینه کارکوونکې د ناپېژاهده وسله والو له خوا په مرګ ګواښل شوې دي.
