د اروپايي ټولنې پارلمان غړې هانا نیومن بروکسل ته د طالب پلاوي د بلنې په غبرګون کې ویلي، په داسې حال کې، چې افغانستان کې میلیونه نجونې له زده کړو بې برخې دي، له ې ډلې سره د اروپايي ټولنې عامل یو تریخ او دوه مخی ګام دی.
رخشانه: نیومن پرون جمعه د (غبرګولي ۱۵ مه) بلجیم کې د مېشتې «اوراکتیو» خبري شبکې سره مرکه کې، له طالبانو سره د اروپايي ټولنې د تعامل او اروپا ته د دې ډلې د پلاوي په بلنه سختې نیوکې کړې دي.
هانا نیومن یوراکتیو ته ویلي دي: «څوک چې د بهرني سیاست اصول د کډوالو د ایستلو ژمنو قرباني کوي، هغوی هم خپل باور او هم خوندیتوب له لاسه ورکوي.»
نیومن بروګسل ته د طالبانو د پلاوي بلنه یو «تریخ او دوه مخی» ګام بللی زیاته کړې یې ده: سره له دې، چې میلیونونه افغان نجونې د زده کړې له حق نه محرومې دي، خو د طالبانو استازي په آزاده توګه اروپا ته سفر کولی شي.»
هغې ویلي: «که وښودل شي، چې اروپا په دومره آسانۍ تر فشار لاندې راځي، نور استبدادي رژیمونه به هم ډېر ژر خپلو موخو ته ورسږي.»
اروپايي کمېسیون دوه اوونۍ وړاندې اعلان وکړ، چې ټاکل شوې د طالبانو یو پلاوی د فني خبرو لپاره بروکسل ته سفر وکړي.
د دې کمېسیون په وینا، د بروکسل خبرې اترې به تر فني کچې پورې وي او تر ډېره به د هغه افغان کډوالو د ایستلو پروسې اسانه کولو باندې متمرکزه وي، چې امنیت ته ګواښ ګڼل کېږي یا په جرمونو محکوم شوي دي.
اروپايي ټولنې ټینګار کړی، چې په دې ناسته کې به هېڅ لوړ پوړی چارواکی ګډون ونه لري، تر څو د طالبانو رژیم ته د مشروعیت ورکولو له هر ډول برداشت څخه مخنیوی وشي.
دا لنډ مهالې بلنه وروسته له هغې تر سره کېږي، چې اروپايي ټولنې خبرداری ورکړی و، چې د طالبانو له لوري «هدفي سرغړونې» ښايي د «جنسیتي ځورونې» بېلګې وي.
د اروپايي ټولنې د پارلمان غړې هانا نیومن، په وار وار د افغان کډوالو په تړاو اروپايي ټولنې ته د طالب چارواکو پر بلنې غبرګون ښودلی دی.
هغه څه موده وړاندې د اروپايي ټولنې پارلمان کې د خپلې وینا پر مهال، د طالبانو له لوري د افغان ښځو او نجونو ځپل یو «ظالمانه او وحشي» عمل وباله ویې ویل، د دې ډلې د چارواکو پر مخ د دروازې پرانستل، د اروپايي ټولنې کمېسیون، اروپايي ټولنې د پارلمان او اروپايي ټولنې د شورا د ژمنو خلاف دي.
