د ننګرهار ولایت مرکز جلال آباد ښار کې ځايي سرچینې وايي، دوه ماشومان، د دې ښار د درېیمې ناحیې اړوند سیمه کې، د کابل سیند کې د لامبو پر مهال ډوب شوي او ژوند یې له لاسه ورکړی دی.
رخشانه: جلال آباد ښار کې دوه ځايی سرچینو ویلي، دا دوه ماشومان نن (شنبې د غبرګولي ۱۶مه) له ماسپښین وروسته، د «چکنورۍ» سیمه کې په سیند کې ډوب شوي او اوبو وړي دي.
د سرچینې په وینا، دواړه ماشومان د چکنوري سیمې اوسېدونکي او د بهسودو پل سره نېږدې د لامبو پر مهال په اوبو کې ډوب او ژوند یې له لاسه ورکړی دی.
سرچینې زیاته کړې دا دواړه ماشومان نذیر احمد او زهیر احمد نومېږي. د هغوی عمرونه ۱۱ او ۹ کلونه دي.
سرچینه وايي، د دواړو ماشومانو جسدونه تر اوسه نه دي موندل شوي.
د دې ماشومانو د کورنۍ غړو، د بهسود، کامې او ګوشتې ولسوالۍ له اوسېدونکو غوښتي، چې د هغوی د جسدونو موندلو کې ورسره مرسته وکړي.
ننګرهار کې طالب چارواکو هم له خلکو غوښتي، چې د اوړي په ګرمۍ کې، خپل ماشومان سیند ته د لامبو لپاره ونه لېږي.
