هرات کې د طالبانو له لوري د ښځو او نجونو پر حجاب د محدودیتونو له سختولو او د هغوی له نیولو وروسته، د «جنبش شنبه های ارغوان» غورځنګ غړو ویلي، د ښځو نیول له نړیوالې تولنې د طالبانو د باج اخیستو سیاست دوام دی.
رخشانه: د دې غورځنګ غړو نن (یکشنبې د غبرګولي ۱۷ مه) په یوه اعلامیه کې، هرات کې د ښخو غیرقانوني، پراخه او هدفمنده نیونه، په سختو ټکو غندلې ده.
د دې غورځنګ په اعلامیه کې راغلي، هرات کې د ښځو نیول د طالبانو، د منظم، تبعیض کوونکي، کینه کښ او ځپوونکي سیاست یوه برخه ده.
د غورځنګ غړې وايي، د طالبانو دا کار له بنسټیزو بشري حقونو ښکاره او څرګنده سرغړونه بلل کېږي او دا «د افغان ښځو د شتون، پوهې، دریځ او مقاومت پر وړاندې د طالبانو بې وسي ښيي.»
هغوی ویلي، طالبان د ښځو له حقونو او خپلواکیو سرغړونه او د هغوی نیونه، له نړیوالې ټولنې د امتیاز تر لاسه کولو او پر هغې د فشار راوړلو په موخه کاروي.
معترضو ښځو زیاته کړې، د «بې حجابۍ» په پلمه د ښځو نیول، د افغان ښځو د انساني کرامت، اساسي خپلواکیو او جامو د انتخاب څخه سرغړونه ده او هېڅ ډول قانوني، اخلاقي او اسلامي توجیه نه لري.
«جنبش شنبه های ارغواني» غړو په هرات کې د طالبانو له زندان نه، د نیول شویو ښځو او نجونو د بې قید و شرطه خوشي کولو غوښتنه وکړه.
معترضو ښځو له نړیوالې ټولنې، د بشري حقونو له مدافع نړیوالو بنسټونو، دولتونو او یوناما غوښتي، چې د دې ناوریني وضعیت په اړه چوپتیا غوره نه کړي.
دوی د «نیول شویو ښځو د وضعیت، د خپل سرو نیونو پر دوام، تېري او د دې ډلې په زندانونو کې د ښځو او سړیو د جنسي ځورونې» په اړه اندېښنه ښودلې ده.
طالبانو له پرون سهار راهیسې په هرات کې د ښځو او نجونو په حجاب او ګرځېدو محدودیتونه سخت کړي دي. د دې محدودیتونو په ترڅ کې د هرات ښار له بېلا بېلو برخو لسګونه ښځې او ځوانې نجونې، د طالبانو د امربالمعروف ځواکونو له خوا نیول شوې او نامعلوم ځای ته لېږدول شوې دي.
