د ننګرهار ولایت کامې ولسوالۍ په روغتون کې یوې باوري سرچینې ویلي، دې ولسوالۍ کې د یوې ماشومې نجلۍ جسد له سیند څخه موندل شوی دی.
رخشانه: د دې ماشومې جسد نن (یکشنبې د غبرګولي ۱۷ مه) د سیمې د خلکو له خوا موندل شوی او د کامې روغتون ته لېږدول شوی دی.
د سرچینې په وینا، د دې ماشومې جسد د کونړ سیند څپو د ننګرهار کامې ولسوالۍ ته وړی وو.
سرچینې زیاته کړې، د دې ماشومې نیمايي سر له منځه تللی دی.
د دې ماشومې هویت نه دی معلوم، خو عمر یې د ۱۲ او ۱۳ کلونو تر منځ اټکل شوی دی.
تر اوسه معلومه نه ده، چې دا ماشومه څه ډول سیند ته لوېدلې ده.
د دې ماشومې جسد د کامې د خلکو له خوا روغتون ته لېږدول شوی او دا مهال د روغتون په بېړنۍ څانګه کې ساتل کېږي.
ننګرهار کې ځايي طالب چارواکو تر اوسه په دې اړه څه نه دي ویلي.
