وروسته له هغې چې له اروپايي هېوادونو د افغان کډوالو د ایستلو په تړاو د خبرو اترو لپاره، اروپا ته د طالب پلاوي د بلنې راپورونه خپاره شول، د «جنبش آزادګان در تبعید» غړو ویلي، اروپا ته د طالب پلاوي بلنه د بشري حقونو له اصولو سرغړونه ده.
رخشانه: د دې غورځنګ غړو نن (یکشنبې د غبرګولي ۱۷ مه) د یوې اعلامیې په خپرولو سره، اروپا ته د طالب چارواکو د بلنې په اړه «اندېښنه» ښودلې ده. د دوی په اعلامیه کې راغلي، دا ګام د بشري حقونو، عدالت، خپلواکۍ او نړیوالې ټولنې له ارزښتونو سره په ټکر کې دی.
د دې اعتراضي غورځنګ غړو ویلي، طالبانو پر افغانستان له بیا واکمنېدو وروسته، په منظم ډول د ښځو او نجونو حقونه تر پښو لاندې کړي، ښځې یې په ټولنیز، سیاسي او اقتصادي ژوند کې له ګډون څخه محرومې کړې دي.
د دوی په وینا، په نړیوالو ناستو کې د طالبانو ګډون او هغو ته مشروعیت ورکول، د میلیونونو افغان ښځو او وګړو کړاو ته، چې د دې افراطي او ښځې ځپوونکې ډلې د سیاستونو قرباني دي، نه پاملره ده.
معترضو ښځو ویلي، د افغانستان د راتلونکې په اړه خبرې اترې نه باید مدني ټولنې، ښځو، بشري حقونو د مدافعانو او د افغانستان د دیموکراتیکه ځواکونو د استازو پرته تر سره شي.
هغوی ویلي، له طالبانو بلنه، په داسې حال کې چې دغه ډلې د بشري حقونو نقض ته دوام ورکوي، قربانیانو ته یو اندېښمنوونکی پیغام رسوي او د عاملینو د حساب ورکولو هڅې کمزورې کوي.
د دې غورځنګ غړو د بروکسل غونډې له جوړونکو، ګدون کوونکو دولتونو، نړیوالو بنسټونو او بشري حقونو له مدافعینو غوښتي، چې د طالبانو د ځپوونکو پالیسیو په وړاندې روښانه او اصولي دریځ ونیسي.
همدارنګه هغوی د بروګسل ناستې له ګډنوالو غوښتي، اجازه ورنه کړي، چې د طالبانو حضور، په افغانستان کې د جنسیتي توپیر د عادي کولو، مشروعیت ورکولو او له بشري حقونو څخه د سرغړونې په توګه وګڼل شي.
معترضو ښځو د افغان ښځو او نجونو د حقونو پر برابرۍ ټینګار وکړ او له نړیوالې ټولنې یې وغوښتل، چې د ښځو او د بشري حقونو د قربانیانو غږ واوري.
د اروپا کمېسیون دوه اوونۍ وړاندې اعلان وکړ، چې ټاکل شوې د فني خبرو اترو لپاره د طالبانو یو پلاوی بروکسلته سفر وکړي. په دې خبرو کې به له اروپايي هېوادونو د افغان کډوالو د ایستلو په اړه تمرکز وشي.
اروپايي ټولنې ټینګار کړی، چې هېڅ لوړ پوړی سیاسي چارواکی به په دې ناسته کې ګډون ونه لري، تر څو د طالبانو رژيم ته د مشروعیت ورکولو له هر ډول ګمان کولو څخه مخنیوی وشي.
د دې ناستې کره وخت او بروکسل ته د طالب پلاوي د ترکیب په اړه معلومات نشته. تر اوسه طالبانو هم په دې اړه څه نه دي ویلي.
