له هرات ښار نه د لسګونه ښځو او ځوانو نجونو د نیولو په ترڅ کې، د دې ښار اوسېدونکو، په دې ولایت کې طالب والي ته په یوه لیک کې لیکلي، په هراتي ښځو د محدودیتونو پلي کول، د دې ولایت د خلکو په وړاندې بې عدالتي کینه کښه چلنده دی.
رخشانه: په دې لیک کې چې پرون شنبې (د غبرګولي ۱۶ مه) د هرات اوسېدونکو له خوا په دې ولایت کې د طالبانو د والي په ادرس لیکل شوی، راغلي د ښځو او نجونو نیونه باید ژر تر ژره ودرول شي.
د هرات اوسېدونکو لیکلي «هراتي ښځې او نجونې د جامو او ټولنیز چلند له پلوه د دیني او ټولنیزو ارزښتونو ژوندی مثال دی او دا ولایت تل د هېواد یو له مهمو کلتوري، علمي او تمدني مرکزونو څخه پېژندل شوی دی.»
هغوی د «خپلې خوښې د محدودیتونو او افراطي تفسیرونو پلي کولو» په اړه اندېښنه ښودلې ویلي یې دي: «دا محدودیتونه د هرات له کلتوري او تاریخي روحیې سره جوړ نه راځي او کولی شي د دې ولایت په کلتوري څېره منفي اغېز وکړي.»
د هراتي اوسېدونکو په وینا، «ښه به دا وي، هر هغه اقدام، چې د هرات کلتوري حیثیت ته زیان رسوي یا ټولنیز وېش رامنځ ته کوي، مخه یې ونیول شي.»
د هرات اوسېدونکو په خپل لیک کې لیکلي: «یوازې په هرات کې پر ښځو د محدودیتونو پلي کول، د هرات د خلکو په وړاندې بې عدالتي او له کینې ډک چلند دی.»
دوی په دې ولایت کې د ښځو او نجونو پر جامو او حجاب د محدودیتونو په لګولو نیوکه کړې او طالبان یې د «یو بام او دوه هواوې» سیاست په چلولو تورن کړي دي.
هرات کې د طالبانو له لوري د ښځو او نجونو پر حجاب او ګرځېدو د محدودیتونو په ترڅ کې، له پرون راهیسې لږ تر لږه ۲۰ ښځې او ځوانې نجونې د «بې حجابۍ، ماسک نه لرلو او وېښتانو ښکارېدو» په تور د ښار له بېلا بېلو برخو نیول شوې او نامعلوم ځای ته لېږدول شوې دي.
هرات کې د طالبانو ځايي ادارې د جمعې په ورځ (د غبرګولي ۱۵ مه) په یوه غونډه کې پرېکړه کړې، چې د شنبې له ورځې به هغه «ښځې او نجونې، چې چادرۍ، مخ بند نه لري او تنګې جامې او سینګار کړې بازار او عامه سړکونو ته وځي» نیسي او زندان ته به یې اچوي.
د طالبانو د امربالمعروف ځواکونو له خوا د هراتي ښځو او نجونو نیونې، د بشري حقونو د فعالانو غبرګونونه راپارولي او د هېواد وګړي یې غوسه کړي دي.
