د طالبانو له طبیعي پېښو سره د مبارزې ملي اداره وايي، د روان لمریز کال له پیل راهیسې تر اوسه، د ۴۱ ماشومانو، ۷ ښځو او ۲۷ نارینه وو په ګډون ۷۵ تنه په اوبو کې ډوب او ژوند یې له لاسه ورکړی او درې تنه نور ټپیان شوي دي.
رخشانه: د دې ادارې طالب ویاند محمد یوسف حماد نن (دوشنبې د غبرګولي ۱۸ مه) پر خپله اېکس پاڼه په یوه ویډیو کې دا شمېرې خپرې کړې دي.
هغه په دې ویډیو کې وايي، دا شمېرې د روان لمریز کال د وري میاشتې له اولې د غبرګولي تر ۱۵ مې پورې موده نیسي.
د حماد په وینا، دا شمېر خلک په ټول هېواد کې په اوبو کې د ډوبېدو له امله مړه شوي دي.
هغه له خلکو غوښتي، چې د تفریح او په سیندونو، حوزونو او بندونو کې د لامبو د خوندیتوب توکي په پام کې ونیسي.
د دغې ادارې ویاند همدارنګه له خلکو غوښتي، چې د سېلابونو راوتلو او د سیندونو اوبو د کچې لوړېدو پر مهال اوبو ته له نېږدې کېدو ډډه وکړي.
هر کال د پسرلي په موسم او د سنیدونو د اوبو کچې لوړېدو سره سم، د هېواد په یو شمېر ولایتونو کې خلک د لامبو مهارت نه لرلوله امله په اوبو کې ډوب او ژوند له لاسه ورکوي.
