پکتیکا کې د طالبانو امنیه قوماندانۍ په یوه خبرپاڼه کې ویلي، د دې ولایت په یحی خېل ولسوالۍ کې یوه ښځه او یو سړی وژل شوي دي.
رخشانه: په خبرپاڼه کې راغلي، دا پېښه پرون سهار (یکشنبې د غبرګولي ۱۷ مه) د یحی خېل ولسوالۍ د «میترګي» په کلي کې رامنځ ته شوې ده.
پکتیکا کې د طالبانو امنیه قومانداني وايي، دا ښځه او سړی د «نامشروع اړیکې» په تور وژل شوي دي.
خبرپاڼه کې د وژل شویو دوه کسانو د هویت او عمر په اړه جزیات نه دي ورکړل شوي.
معلومه نه ده، چې دا ښځه او سړی د څه شي په وسیله وژل شوي دي.
پکتیکا کې د طالبانو امنیه قوماندانۍ زیاته کړې، چې د پېښې په تړاو درې تنه نیول شوي دي.
طالبانو ویلي، د پېښې د سپیناوي لپاره یې خپلې پلټنې پیل کړې دي.
دا په داسې حال کې ده، چې د تېرې پنشنبې په ورځ د ننګرهار کوز کونړ ولسوالۍ کې یوه ښځه او یو سړی د «مینې د اړیکې» په تور د ښځې د ورور له خوا وژل شوي وو.
د طالبانو له بیا واکمنېدو وروسته، په هېواد کې ناموسي وژنې او جنايي پېښې بې مخینې زیاتې شوې دي.
د رخشانې رسنۍ د شمېرو له مخې، په تېر یوه کال کې د هېواد په ۲۳ ولایتونو کې لږ تر لږه ۱۱۷ ښځې او نجونې، د کورنیو، د بېوزلۍ له امله د ځان وژنې او له کوره د تېښتې پېښو قرباني شوې دي.
طالبان تر ډېره په هېواد کې د ښځو او نجونو د ځان وژنې او جنايي پېښې پټې کړې او نه یې رسنیزې کوي. دا ډله ځايي سرچینو ته هم د جنايي پېښو د رسنیز کولو اجازه نه ورکوي.
